ქართული ოცნების წევრი ნუკრი ქანთარია მიიჩნევს, რომ ნიკა გვარამიას მსგავს ადამიანებს სახელმწიფო უსაფრთხოების სამსახური უნდა უსმენდეს. ამის შესახებ ქანთარიამ დღეს, კვირას პრესკლუბში გამართულ ბრიფინგზე იმ დროს ისაუბრა, როცა მას ჟურნალისტებმა გვარამიასა და მამუკა ახვლედიანის ფარული ჩანაწერის გამოქვეყნებაზე ჰკითხეს:

"გვარამიას აწყობს, რომ დროდადრო რაღაც ჩანაწერი გამოუდონ, იყოს წინა პლანზე და ბუნებრივია, მას აქვს თავისი გეგმა, შეთანხმებული ოდესასთან. ის არც მალავს, რომ უნდა, რაც შეიძლება მეტი მავნებლობა მოუტანოს ხელისუფლებას. აუცილებელია, რომ ასეთ ხალხს უსმენდნენ, მაგრამ ეს არ ნიშნავს, რომ უნდა გამოქვეყნდეს ეს ჩანაწერები და ეს ჩანაწერი, რომელიც ახლა გამოქვეყნდა, რისი დამადასტურებელი და რისი მაქნისია, ხომ? არაფრის. სუსში ასეთი ხალხი არ ზის, ასეთი მოკლე ჭკუის, რომ მსგავსი ჩანაწერები შეაგროვოს და მერე მითუმეტეს, სცადოს გამოქვეყნება. ეს არის ისევ მისი ინიციატივა, მაგრამ ამას ბუნებრივია სჭირდება დამტკიცება და თუ ამას სამართალდამცავები იტყვიან, ეს უნდა დაამტკიცონ".

ნიკა გვარამიასა და საქალაქო სასამართლოს ყოფილი თავმჯდომარის 3–წუთიანი და 19–წამიანი საუბარი დღეს გამოაქვეყნა იუთუბ არხმა Creative Georgian News. ნიკა გვარამია და მამუკა ახვლედიანი ჩანაწერში საქალაქო სასამართლოში შექმნილ სიტუაციაზე საუბრობენ.