ნაციონალური მოძრაობის წევრი, გიორგი ბარამიძე ევროპული საქართველოსგან ითხოვს, რომ ნიკა მელიას შესახებ ოთო კახიძის განცხადებაზე განმარტება გააკეთოს. პარლამენტის დეპუტატმა, ოთო კახიძემ აღნიშნა, რომ მელიამ 20 ივნისს აქციაზე პარლამენტში მშვიდობიანად შესვლაზე პროვოკაციული და უპასუხისმგებლო განცხადება გააკეთა.

გიორგი ბარამიძე ამბობს, რომ პარტიამ უნდა განმარტოს, ოთო კახიძის განცხადებას ემიჯნება თუ არა.

"რეჟიმის წინააღმდეგ ბრძოლის ამ მნიშვნელოვან ფაზაში ეს ძალიან პრინციპული საკითხია, სახელმწიფო ბრალდებას ახმოვანებთ და მათ აზრს იზიარებთ, თუ ნიკას გვერდით დგახართ?" — წერს ბარამიძე ფეისბუქზე.

ნიკა მელიას "უპასუხისმგებლო განცხადებაზე" მოსაზრებას იზიარებს ევროპული საქართველოს ლიდერი, გიგა ბოკერიაც. ამავე დროს, აღნიშნავს, რომ წაყენებული ბრალი "სრული აბსურდია".

"ამ ტიპის განცხადებები, სხვა ყველაფერს რომ თავი გავანებოთ, სულ მცირე ივანიშვილის უადვილებს პროპაგანდას. ჩემი აზრით, ნაციონალური მოძრაობა ამ სამართლიან კრიტიკას უნდა შეეგუოს. ან არ შეეგუოს და აწარმოოს ამაზე დისკუსია", — ამბობს პარლამენტის დეპუტატი, გიგა ბოკერია.

ნიკა მელიას საქმე

პროკურატურა მელიას პატიმრობას 20 ივნისის აქციის საქმეზე ითხოვს. კერძოდ, დეპუტატს ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.

უწყება აცხადებს, რომ მელია მოუწოდებდა დემონსტრანტებს პარლამენტში შეჭრილიყვნენ. მელიას კი ამბობს, რომ არ მოუწოდებია და პარლამენტში შესვლაზე კითხვა დასვა.

27 ივნისს თბილისის საქალაქო სასამართლომ მელიას 30 ათასი ლარის ოდენობის გირაო შეუფარდა. გარდა ამისა, მოსამართლემ მას სხვა შეზღუდვების დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

სააპელაციო სასამართლომ ნიკა მელიას საქმეზე არც დაცვის და არც ბრალდების მხარის სარჩელი არ დააკმაყოფილა და საქალაქო სასამართლოს მიერ დაწესებული შეზღუდვები ძალაში დატოვა. ამავე განჩინებით, მელიას შეზღუდვის ახალი სახე ელექტრონული მონიტორინგი დაემატა.