ევროპული საქართველოს ლიდერის, გიგა ბოკერიას თქმით, 20 ივნისს ნაციონალური მოძრაობის დეპუტატის, ნიკა მელიას განცხადებები პოლიტიკურად უპასუხისმგებლო იყო, თუმცა მისთვის წაყენებული ბრალდება "სრული აბსურდია".

"ამ ტიპის განცხადებები, სხვა ყველაფერს რომ თავი გავანებოთ, სულ მცირე ივანიშვილის უადვილებს პროპაგანდას. ჩემი აზრით, ნაციონალური მოძრაობა ამ სამართლიან კრიტიკას უნდა შეეგუოს. ან არ შეეგუოს და აწარმოოს ამაზე დისკუსია", — ამბობს პარლამენტის დეპუტატი, გიგა ბოკერია.

მას მიაჩნია, რომ მელიასთვის წაყენებულ ბრალი "პოლიტიკურად უტიფარი მცდელობაა", რომ ხელისუფლებამ მოიხსნას პასუხისმგებლობა, რომელიც ქართული ოცნების თავმჯდომარეს, ბიძინა ივანიშვილსა და შინაგან საქმეთა მინისტრს, გიორგი გახარიას ეკისრებათ.

გარდა ამისა, დეპუტატი არ ეთანხმება მოსაზრებას, რომ რამდენიმე ათეული პირის ძალადობრივი ქმედება, ათიათასკაციან მიტინგს ძალადობრივად აქცევდა.

ნიკა მელიას საქმე

პროკურატურა მელიას პატიმრობას 20 ივნისის აქციის საქმეზე ითხოვს. კერძოდ, დეპუტატს ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.

უწყება აცხადებს, რომ მელია მოუწოდებდა დემონსტრანტებს პარლამენტში შეჭრილიყვნენ. მელიას კი ამბობს, რომ არ მოუწოდებია და პარლამენტში შესვლაზე კითხვა დასვა.

27 ივნისს თბილისის საქალაქო სასამართლომ მელიას 30 ათასი ლარის ოდენობის გირაო შეუფარდა. გარდა ამისა, მოსამართლემ მას სხვა შეზღუდვების დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

სააპელაციო სასამართლომ ნიკა მელიას საქმეზე არც დაცვის და არც ბრალდების მხარის სარჩელი არ დააკმაყოფილა და საქალაქო სასამართლოს მიერ დაწესებული შეზღუდვები ძალაში დატოვა. ამავე განჩინებით, მელიას შეზღუდვის ახალი სახე ელექტრონული მონიტორინგი დაემატა.