საქართველოს პარლამენტთან ანტისაოკუპაციო აქცია #სირცხვილია განახლდა. ეს პროტესტის მე-20 დღეა. მოთხოვნა უცვლელია — გადადგეს შინაგან საქმეთა მინისტრი გიორგი გახარია.

გუშინ, 8 ივლისს რუსთაველის გამზირზე ერთდროულად ორი აქცია მიმდინარეობდა. აქცია #სირცხვილიას მონაწილეებს ჰომოფობიურად განწყობილმა ჯგუფებმა პარლამენტის წინ დადგომის საშუალება არ მისცეს და არც აპარატურა ააწყობინეს. საათების განმავლობაში ორ აქციას პოლიციის კორდონი და ყვითელი ავტობუსები ჰყოფდა. აქციის მონაწილეებმა მთელი ღამე რუსთაველის გამზირზე გაათენეს. რამდენჯერმე მოხდა მცირე დაპირისპირება. გამთენიისას ჩაკეტილი რუსთაველის გამზირი გაიხსნა. აქცია #სირცხვილიას მონაწილეებმა პარლამენტთან ტერიტორია დაიკავეს.

ფოტო: ანა ვახტანგაძე / On.ge

ფოტო: ანა ვახტანგაძე / On.ge

#სირცხვილია

საქართველოში ანტისაოკუპაციო აქციები #სირცხვილია მე-20 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება. შედეგად, აქციები ამ დრომდე გრძელდება შინაგან საქმეთა მიინისტრის გიორგი გახარიას გადაგომის მოთხოვნით.