შვედი მუსიკოსი Avicii-ის გარდაცვალებიდან ერთ წელზე მეტი გავიდა. კოლეგებმა და მეგობრებმა DJ-ის სახელის უკვდავსაყოფად ვიდეო ჩაწერეს, რომელიც იუთუბზე 24 ივნისს გამოქვეყნდა.

ვიდეოს რეჟისორი ლევან ციქურიშვილია. მასში გარდაცვლილი დიჯეის ცხოვრებიდან უცნობ მომენტებს ვეცნობით, კლიპში კი Coldplay-ის სოლისტი კრის მარტინი მღერის.

Heaven მესამე ტრეკია Avicii-ის, იგივე ტიმ ბერგლინგის სიკვდილის შემდეგ გამოსულ ალბომში, Tim. ის მარტინმა და ბერგლინგმა 2014 წელს ჩაწერეს, თუმცა არასდროს გამოქვეყნებულა.

"ტიმთან ერთად 19 საოცარი დღე გავატარე მადაგასკარზე მისი ბოლო შოუს შემდეგ. ჩვენ ყველაფერზე ვისაუბრეთ, ვიცინეთ, მონოპოლი ვითამაშეთ, ვისეირნეთ ლემურებთან ერთად და მთელი კუნძული ერთად გავიცანით", — წერს ციქურიშვილი ვიდეოს აღწერაში.

კლიპში Avicii-ს სხვადასხვა სიტუაციაში ვხედავთ — სანაპიროზე, დაკვრისას, ნავით ცურვისას და ლემურებთან. სიმღერაში კი განმეორებით გვესმის მარტინის სიტყვები "I think I just died and went to heaven", (მგონი მოვკვდი და სამოთხეში მოვხვდი). ტექსტის ავტორი სწორედ კრის მარტინია.

ბერგლინგი და ციქურიშვილი ერთად რამდენიმე პროექტზე მუშაობდნენ. კლიპში გამოყენებულ კადრებზე რეჟისორი ამბობს, რომ მათი დიდი ნაწილი მისივე სმარტფონიდან ამორჩეული ვიდეოებია.

შვედი მუსიკოსი Avicii გასული წლის 20 აპრილს, 28 წლის ასაკში გარდაიცვალა. ექსპერტიზის მიხედვით, მისი გარდაცვალების მიზეზი თვითმკვლელობა იყო.