ანტისაოკუპაციო აქცია #სირცხვილიას საორგანიზაციო ჯგუფის წევრმა, მიშა მშვილდაძემ განაცხადა, რომ აქცია დღესაც ჩატარდება. მან საორგანიზაციო ჯგუფის განცხადება წაიკითხა და მოუწოდა მოქალაქეებს, რომ თავისუფლების მოედანზე, პუშკინის სკვერთან საღამოს შვიდ საათზე შეიკრიბონ, საიდანაც პარლამენტისკენ დაიძრებიან.

"დღეს წყდება, მოახერხებენ თუ არა პრორუსული ძალები და რუსეთის ხელისუფლებისგან მართული ჯგუფები შექმნან ილუზია, რომ ეს ქვეყანა მათ ეკუთვნით. დღეს, პარლამენტის წინ ადგილობრივი გავრილოვები ცდილობენ თავისუფალი სივრცის სიმბოლურად დაპატრონებას; მოვუწოდებთ თავისუფალ ადამიანებს, დღეს, 19 საათზე გამოვიდნენ რუსთაველის გამზირზე, მშვიდობიანად, ჩვენი აქციებისთვის დამახასიათებელი სიმბოლიკით, საქართველოს, ევროკავშირისა და ნატოს დროშებით. ამავდროულად, მოვუწოდებთ სახელმწიფოს, მხედველობაში მიიღოს კონტრაქციის მონაწილეების ძალადობრივი მოწოდებები, შეასრულოს მისი ვალდებულება და უზრუნველყოს შეკრება-მანიფესტაციის მონაწილეთა უსაფრთხოება და ამ უფლებით სრულყოფილი სარგებლობა", — განაცხადა მიშა მშვილდაძემ.

მისივე თქმით, #სირცხვილიას აქციის მონაწილეები პარლამენტის წინ შეკრებილებთან მშვიდობიანად და ხელებაწეულები მივლენ.

"მშვიდობიანად დავიკავებთ იმ ადგილს, რომელზეც მე-19 დღეა ვაპროტესტებთ და გავაგრძელებთ ჩვენს მშვიდობიან პროტესტს, სანამ არ შესრულდება ჩვენი მთავარი მოთხოვნა".