აქციის #სირცხვილია ორგანიზატორი, შოთა დიღმელაშვილი ამბობს, რომ აქცია არ გაუქმებულა და ტრადიციულად, შვიდ საათზე, პარლამენტის შენობასთან გაიმართება. მისივე თქმით, შეეცდებიან, კონფლიქტი აირიდონ თავიდან. ასე ეხმაურება დიღმელაშვილი On.ge-სთან ლევან ვასაძის, მმკ-სა და ქართული მარშის მიერ პარლამენტის მიმდებარე ტერიტორიის დაკავებას.

"არ გვაქვს იმის ილუზია, რომ ეს ჯგუფები მართული არ არის შინაგან საქმეთა სამინისტროს მხრიდან... ყველაზე საწყენი ის არის, რომ ხელისუფლება ალიანსში შედის შავრაზმელ ჯგუფებთან და ბოროტებასთან, მშვიდობიან მანიფესტანტების წინააღმდეგ. ეს მოსალოდნელი იყო. ჩვენ დავიცავთ ჩვენს სიტყვის თავისუფლებას, იმათ სიტყვის თავისუფლებას პატივს ვცემთ. მივალთ, გავესაუბრებით და შევეცდებით, კონფლიქტი ავიცილოთ თავიდან. თუ მაინც, პროვოკაციისთვის არიან, არ მივცემთ თავის მოწონების საშუალებას", — თქვა დიღმელაშვილმა.

მისივე განცხადებით, შინაგან საქმეთა სამინისტროს სურს, "მშვიდობის მტრედად" გამოვიდეს და თავისივე მიგზავნილ ხალხსა და მათ შორის ჩადგეს, ანტისაოკუპაციო აქციის მონაწილეები კი აგრესიულ ჯგუფად გამოიყვანოს.

დეკანოზმა დავით ისაკაძემ დღეს, 8 ივლისს თქვა, რომ პარლამენტთან ანტისაოკუპაციო აქციის ჩატარებას ხელს შეუშლის. პარლამენტთან ანტიოკუპაციური აქცია #სირცხვილია უკვე 18 დღეა მიმდინარეობს. პროტესტი საქართველოში რუსეთის დუმის კომუნისტი დეპუტატის, სერგეი გავრილოვის ვიზიტსა და პარლამენტის სავარძელში დაჯდომას მოყვა. ამის გასაპროტესტებლად პარლამენტთან აქცია გაიმართა, რომელიც პოლიციასთან დაპირისპირებაში გადაიზარდა. 20-21 ივნისის ღამეს სპეცრაზმმა აქცია ძალის გადამეტებით დაშალა. შედეგად დაშავდა ასეულობით და დასახიჩრდა ათეულობით ადამიანი. მეორე დღიდან დემონსტრანტები შს მინისტრის პასუხისმგებლობის გადაყენებას ითხოვენ, თუმცა ის გადადგომაზე უარს ამბობს, რასაც მმართველი გუნდიც უჭერს მხარს.