დეკანოზ დავით ისაკაძის განცხადებით, პარლამენტთან ანტისაოკუპაციო აქციის #სირცხვილია გაგრძელებას ხელს შეუშლის. ამის შესახებ მან პარლამენტთან, პრაიმტაიმის ლაივში განაცხადა.

მისი თქმით, "პარლამენტთან აქცია აღარ ჩატარდება". ისაკაძემ უკმაყოფილება გამოთქვა იმასთან დაკავშირებით, რომ აქცია უკვე ორ კვირაზე მეტია გრძელდება.

"ჩვენი საყვარელი ადგილია რუსთაველის პროსპექტი და გვინდა, ბავშვებთან ერთად გამოვიაროთ. აქ მხვდება გაურკვეველი ორიენტაციის და ცნობიერების ადამიანები, რომელთაც შეიძლება რაღაც ისეთი პროვოკაციული ქმედებები გამოხატონ, რომელმაც შეიძლება წარმოშვას კონფლიქტური სიტუაციები. სხვაგან გამართონ", — თქვა მან.

პარლამენტთან ანტიოკუპაციური აქცია #სირცხვილია უკვე 18 დღეა მიმდინარეობს. პროტესტი საქართველოში რუსეთის დუმის კომუნისტი დეპუტატის, სერგეი გავრილოვის ვიზიტსა და პარლამენტის სავარძელში დაჯდომას მოყვა. ამის გასაპროტესტებლად პარლამენტთან აქცია გაიმართა, რომელიც პოლიციასთან დაპირისპირებაში გადაიზარდა. 20-21 ივნისის ღამეს სპეცრაზმმა აქცია ძალის გადამეტებით დაშალა. შედეგად დაშავდა ასეულობით და დასახიჩრდა ათეულობით ადამიანი. მეორე დღიდან დემონსტრანტები შს მინისტრის პასუხისმგებლობის გადაყენებას ითხოვენ, თუმცა ის გადადგომაზე უარს ამბობს, რასაც მმართველი გუნდიც უჭერს მხარს.