ნუგზარ დაბრუნდაშვილმა, რომელმაც რამდენიმე დღის წინ ძამას ხეობაში აჭარლების რელიგიური ნიშნით დისკრიმინაციაზე ისაუბრა, ქარელის ვიცე-მერის თანამდებობა დატოვა. ამის შესახებ On.ge-ს ქარელის მერიაში დაუდასტურეს.

მერიაში აცხადებენ, რომ დაბრუნდაშვილმა თანამდებობა პირადი განცხადების საფუძველზე დატოვა. თავად დაბრუნდაშვილმა On.ge-სთან თანამდებობის დატოვების შესახებ არ ისაუბრა.

პირველ ივლისს Qartli.ge-ს გადაცემა ქართლის სტუდიაში დაბრუნდაშვილმა თქვა, რომ ძამას ხეობის სოფელ გვერძინეთს იქ ჩასახლებული აჭარლები ტოვებენ. ამის მიზეზად მან სასულიერი პირების მხრიდან მათი რელიგიური ნიშნით შევიწროება დაასახელა.