საქართველოს მართლმადიდებელი ეკლესიის საპატრიარქო მრევლს მოუწოდებს, რომ ზაფხულის არდადეგები საქართველოში გაატარონ. გარდა ამისა, ის მოუწოდებს ხელისუფლებასა და ბანკებს, რომ ტურისტულ სფეროში დასაქმებულებს შეღავათი გაუწიონ.

"ა.წ. 19 ივნისიდან განვითარებულმა მოვლენებმა, შეიძლება ტურისტული მომსახურების სფეროში ჩართული არაერთი ჩვენი მოქალაქე სერიოზულად დააზარალოს, რადგან ბევრ მათგანს აღებული აქვს საბანკო კრედიტი და პრობლემები შეექმნება მის დაფარვაში. ამიტომაც ვთხოვთ ხელისუფლებას და ბანკების ხელმძღვანელებს, ვიდრე ვითარება შეიცვლება, მაქსიმალურად გაუწიონ შეღავათი ტურისტულ სექტორში დასაქმებულ კრედიტორებს", — აცხადებს საპატრიარქო.

რუსეთის მიერ რუსული ავიახაზებისთვის საქართველოს მიმართულებითა და ქართული ავიახაზებისთვის რუსეთის მიმართულებით ფრენების აკრძალვის შემდეგ მოქალაქეები გაერთიანდნენ. ფეისბუქზე შეიქმნა ჯგუფი, რომლის მიზანი გაზარადოს და უცხოელებს გააცნოს საქართველოს ტურისტული პოტენციალი. ქართველი და უცხოელი ცნობილი ადამიანები კი მოუწოდებენ ტურისტებს საქართველოს ეწვიონ.