ევროპული საქართველოს დეპუტატი ოთარ კახიძე აცხადებს, რომ საუბარი თითქოს ვიღაც პარლამენტში იჭრებოდა მეასეხარისხოვანია და "ადამიანებზე ნადირობაზე" შს მინისტრია პასუხისმგებელი. მისივე თქმით, მმართველი გუნდი უტიფრად იქცევა, თუმცა ყველანაირ უტიფრობასა და თავხედობას აქვს თავისი საზღვარი.

"როგორც არ უნდა იკამათონ, ვინ რა მოწოდება გააკეთა და ვინ რა ძალა გამოიყენა, გამოიყენეს დიდი ცხოველების გასაჩერებლად შედეგად განკუთვნილი პლასმასის ტყვიები, რითაც ახალგაზრდები დაასახიჩრეს. პოლიცია ხალხს თვალებსა და თავში ესროდა. ახალგაზრდები დაბრმავდნენ და ადამიანები არიან ხელოვნურ სუნთქვაზე, აპარატზე შეერთებულები კომატოზურ მდგომარეობაში, სიკვდილს ებრძვიან. ეს უნამუსო და უტიფარი ხალხი როგორ ბედავს, პასუხისმგებლობა ვინმე სხვას დააკისროს", — განაცხადა ოთარ კახიძემ.

მისივე თქმით, ვინც ბრძანება გასცა თავში სროლაზე, ტყვიების სროლაზე, უმკაცრესად დაისჯება.

"ვინც დაკავებულია, რომ გიორგი გახარიას სამარცხვინოდ გადაეფარონ, პასუხს აგებენ. საკუთარ თავზე აიღეს ეს, იმის ნაცვლად, რომ ამას გამიჯნოდნენ. გადადგეს ეს პირი, მისი პასუხისმგებლობაა, რომ ახალგაზრდები დასახიჩრებული არიან. საუბარი რომ ვიღაც პარლამენტში იჭრებოდა თუ არა, მეასეხარისხოვანია, ნადირობა და ადამიანების თვალების გარეშე დატოვებაზე პასუხისმგებელია მინისტრი. ცოტა ადეკვატურები გახდნენ, მიწაზე დაეშვან, თვალებში ჩახედონ რეალობას, ცალ თვალში მაინც", — ამბობს ოთარ კახიძე.

პარლამენტის პლენარულ სხდომაზე ევროპულმა საქართველომ დღის წესრიგში შს მინისტრის გიორგი გახარიას გადადგომის დადგენილების შეტანა მოითხოვა, რაზეც უარი მიიღო. ამ პროცესს პლენარულ სხდომათა დარბაზში დაპირისპირება მოჰყვა. საქართველოს პარლამენტი ოპოზიციური პარტიის დეპუტატებმა პროტესტის ნიშნად დატოვეს. ოპოზიციის თქმით, გიორგი გახარია უნდა გადადგეს და პასუხისმგებლობა უნდა აიღოს 20-21 ივნისს მომხდარ შემთხვევებზე. უმრავლესობა კი შს მინისტრის პასუხისმგებლობას ვერ ხედავს.

20 ივნისის ანტისაოკუპაციო აქციის რეზინის ტყვიებით, ცრემლსადენი გაზითა და წყლის ჭავლით დაშლის დროს კლინიკებში 240 მოქალაქე გადაიყვანეს. დაშავებულებიდან 2-მა — თვალი დაკარგა, მათ შორისაა 18 წლის მაკო გომური. 2-ის მდგომარეობა სტაბილურად მძიემა. დაზიანებები მიიღო 30-ზე მეტმა ჟურნალისტმა, მათ შორის იყო On.ge-ს სამი თანამშრომელი. ბოლო ინფორმაციით, კლინიკებში მკურნალობას 23 პაციენტი აგრძელებს.