ჰომოფობიური მოძრაობის ერთ-ერთი ლიდერი, გურამ ფალავანდიშვილი გაათავისუფლეს და ის ვერის ბაღში დაბრუნდა. ფალავანშვილის სასამართლო პროცესი 5 ივლისს გაიმართება.

პოლიციამ ფალავანდიშვილი დღეს, 20 ივნისს ადმინისტრაციულ სამართალდარღვევათა კოდექსის 173-ე მუხლით დააკავა, რაც პოლიციელის კანონიერი მოთხოვნისადმი დაუმორჩილებლობას გულისხმობს.

"უკანონო ფორმირების შექმნის, ხელმძღვანელობის და მასში გაწევრიანების ფაქტებზე დაწყებული გამოძიების ფარგლებში, პოლიცია გურამ ფალავანდიშვილთან, გამოკითხვაზე დაბარების მიზნით, უწყების ჩასაბარებლად მივიდა. ფალავანდიშვილმა სამართალდამცველებს წინააღმდეგობა გაუწია და სიტყვიერი შეურაცხყოფა მიაყენა", — აღნიშნავენ შსს-ში.

ფალავანდიშვილი თბილისი პრაიდის წინააღმდეგ გამართული აქციების ერთ-ერთი ორგანიზატორი იყო. აქციებზე მან არაერთხელ გააჟღერა ძალადობრივი შინაარსის მოწოდება.