ქართული ოცნების წევრი, კახა ოქრიაშვილი პოლიტიკური ვითარების განმუხტვის მიზნით, ვადამდელ საპარლამენტო არჩევნების ჩატარებას ითხოვს. ამის შესახებ მან პარლამენტში გამართულ მართლმადიდებლობის საპარლამენტთაშორისო ასამბლეის სხდომის გამართვასთან დაკავშირებით თქვა. ინფორმაციას რუსთავი 2 ავრცელებს.

"მართლმადიდებლობის საპარლამენტთაშორისო ასამბლეის სხდომა თბილისში აღარ უნდა გაგრძელდეს და მეტიც — ვფიქრობ, საქართველომ, როგორც ქვეყანამ, უნდა შეაჩეროს აღნიშნულ ასამბლეაში მუშაობა. გარდა ამისა, ყველა ის პირი, ვინც პასუხს აგებს ფორუმის ამ სახით დაგეგმვასა და წარმართავზე, უნდა წავიდეს როგორც საქართველოს პარლამენტის მმართველი უმრავლესობიდან, ასევე პოლიტიკიდან", — ამბობს ოქრიაშვილი.

მისივე თქმით, ის დღეს დაგეგმილ აქციას შეუერთდება. ის მოუწოდებს ხელისუფლების სხვა წევრებს, მასთან ერთად შეუერთდნენ აქციას.

"ვაჩვენოთ მსოფლიოს, რომ ჩვენი ქვეყნის ოკუპაციის საკითხებში საქართველოს მთავრობაც, მოსახლეობაც, პოზიციაც, ოპოზიციაც და მთელი პოლიტიკური სპექტრი ერთიანია", — ამბობს ოქრიაშვილი.