სიძულვილის ენის გამოყენებაში დადანაშაულებულმა ნანა კოსტავამ ფრაქცია ქართული ოცნება — კონსერვატორები დატოვა. ის ქუთაისის საკრებულოში დამოუკიდებელ დეპუტატად რჩება. ამის შესახებ საკრებულოს თავმჯდომარემ, ნიკოლოზ ლატარიამ განაცხადა.

ლატარია ამბობს, რომ კოსტავასთან კომუნიკაცია არ ჰქონია. მისივე თქმით, საკრებულოს არანაირი ბერკეტი არ აქვს, მას დეპუტატის მანდატი შეუწყვიტოს. საკრებულოს თავმჯდომარე ამბობს, რომ კოსტავა ქართულ ოცნებასთან ასოცირებული აღარ იქნება.

ნანა კოსტავამ 30 მაისს Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

კოსტავა ქართულმა ოცნებამ ფრაქციის თავმჯდომარეობიდან 31 მაისს მოხსნა. ამავე დღეს ის გენდერული თანასწორობის საბჭოდანაც გარიცხეს. კოსტავამ თქვა, რომ საკრებულოს 3 ივნისს დატოვებდა, თუმცა სამში განაცხადა, რომ გადაიფიქრა.

ამავე თემაზე: