პოლიტიკური მოძრაობა გამარჯვებული საქართველოს დამფუძნებლის, ირაკლი ოქრუაშვილის განცხადებით, საქართველო დგას ამოცანის წინაშე — დარჩება ცივილიზებული სამყაროს ნაწილად თუ აღმოჩნდება ბნელ გვირაბში. ამის შესახებ ოქრუაშვილმა ბიზნესმენ ლევან ვასაძის განცხადებებთან დაკავშირებით თქვა.

ოქრუაშვილი ამბობს, რომ ქვეყანა უნდა იმართებოდეს კონსტიტუციით და არავის აქვს უფლება, თავისი თავი სახელმწიფოზე მაღლა დააყენოს და სახელმწიფო ფუნქციების განხორციელება თავის თავზე აიღოს.

"ბოლო დღეების განმავლობაში საქართველოში განვითარებულმა მოვლენებმა ნათლად აჩვენა თუ რა საფრთხეების წინაშე დგას ჩვენი ქვეყანა და როგორი სუსტია ჩვენი სახელმწიფოებრიობა", — თქვა ოქრუაშვილმა.

თბილისი პრაიდთან დაკავშირებით ოქრუაშვილი ამბობს, რომ ქვეყნის მთავარი ღირებულება არის ადამიანი, მიუხედავად მისი მრწამსისა და შეხედულებებისა.

"კონსტიტუცია უზრუნველყოფს სიტყვისა და გამოხატვის თავისუფლებას, ვისიც არ უნდა იყოს ეს. კონსტიტუცია არის მთავარი სამოქმედო დოკუმენტი თითოეული ჩვენგანისთვის", — განაცხადა მან.

ის მოუწოდებს ხელისუფლებას, არ დაუშვას პროცესების კონსტიტუციური ჩარჩოებიდან გასვლა და დაიცვას სახელმწიფო ინსტიტუტების ინტერესები.

"ასევე, მივმართავთ თითოეულ პოლიციელს, დაიცვან სახელმწიფოს ინტერესი, მათი მუნდირის ღირსება, რათა ცალკეულმა ჯგუფებმა არ შეძლონ სახელმწიფოს დაკნინება და მათი მხრიდან სახელმწიფოს ინტერესების ხელში აღება", — აღნიშნა ოქრუაშვილმა.

16 ივნისს "ნამდვილი კაცების" აქციაზე ლევან ვასაძემ სახალხო რაზმების ორგანიზება და ლეგიონის შექმნა დააანონსა. მისი თქმით, ლეგიონის მუშაობის ფორმა იქნება მშვიდი, იარაღის გარეშე. მაგრამ თავადვე აღნიშნა, რომ ნებისმერ კორდონს გაარღვევენ. გუშინ, 17 ივნისს შსს-მ სახალხო რაზმების შექმნის შესახებ ლევან ვასაძის განცხადებაზე გამოძიება დაიწყო.