საარჩევნო სისტემის ცვლილების საკითხზე დიპლომატიურ კორპუსთან შეხვედრის შემდეგ, ნაციონალური მოძრაობის თავმჯდომარემ, გრიგოლ ვაშაძემ განაცხადა, რომ მაჟორიტარები "აბსოლუტური განგრენა არიან". მისი თქმით, ისინი პარლამენტში არაფერს აკეთებენ პირადი ბიზნესინტერესების დაცვის გარდა.

"ეს არიან ინდიელების პატარა ბელადუკები, რომელთაც აქვთ ფული. სხვა მათგან არავითარი აზრი არ არის. ერთი მაჩვენეთ მაგათგან შემოტანილი რამე კანონპროექტი", — განუცხადა ვაშაძემ რუსთავი 2-ს.

დღეს 20-მა ოპოზიციურმა პარტიამ დიპლომატიურ კორპუსთან შეხვედრა გამართა. საქმე ეხება მოთხოვნას შევიდეს ცვლილება კონსტიტუციაში და 2020 წლის არჩევნები პროპორციული წესით ჩატარდეს. პარტიებმა 300 ათასზე მეტი ხელმოწერა შეაგროვეს, რაც საკონსტიტუციო ცვლილებების განხორციელებისთვისაა საჭირო და პარლამენტს მიმართეს.