Netflix ახალი სერიალის გადაღებას გეგმავს. სამურაის ეპოქა: ბრძოლა იაპონიისთვის დოკუმენტური დრამა იქნება, რომელიც ფეოდალური იაპონიის სამეფოების ბრძოლის შესახებ მოგვითხრობს. სერიალში გავეცნობით იაპონიის ყველაზე ძლევამოსილ მთავარსარდლებს, რომლებიც ერთმანეთის წინააღმდეგ აბსოლუტური ძალაუფლების მოსაპოვებლად იბრძოდნენ.

სერიალის მთავარი გმირი დატე მასამუნე, იგივე ცალთვალა დრაკონი იქნება, რომელიც 400 წლის წინ იაპონიის საკუთარი ძალაუფლების ქვეშ გაერთიანებას ცდილობდა. ის ერთ-ერთია იმ ოთხი მთავარსარდლიდან, რომელთა ინტერესებიც ტახტზე იკვეთებოდა და მათი არმიები ერთმანეთს ებრძოდნენ. არსებობს მოსაზრება, რომ ცნობილი ანტაგონისტის, Darth Vader-ის კოსტუმის დიზაინი სწორედ დატე მასამუნეს აბჯრის მიხედვით არის შექმნილი.

ბავშვობაში მასამუნემ დაინფიცირებული თვალი საკუთარი ხელით ამოიგდო. წარმატების უფრო იოლად მისაღწევად კი უმცროსი ძმა მოკლა. 17 წლის ასაკში მამამისი შეცვალა და ჩრდილოეთ იაპონიაში ძალაუფლების გასაზრდელად კლანების გაერთიანება დაიწყო.