ჰომოფობიური კონტრაქციის მონაწილეები სამოქალაქო აქტივისტ ნატა ფერაძეზე თავდასხმის მცდელობისას დააკავეს. "დაამტვრიეთ", "მოკალით", — მოუწოდებდნენ ერთმანეთს ისინი და ნატა ფერაძეს მისდევდნენ, რომელიც პოლიციამ ტერიტორიას განარიდა.

"ქალია" — იძახდნენ პოლიციის თანამშრომლები, რომლებიც კონტრაქციის მონაწილეების მოშორებას ცდილობდნენ. ამ დაპირისპირებას წინ უძღოდა ფერაძის მედიასთან საუბარი, რა დროსაც მას ერთმა პირმა შეაფურთხა.

საბოლოოდ, პოლიციამ ფერაძე ტერიტორიიდან მანქანით გაიყვანა.ის ერთადერთი იყო აქციის მონაწილეებიდან, რომელიც ამ დრომდე კანცელარიასთან დარჩა. ფერაძე ამბობდა, რომ სახლში მხოლოდ იმ გზით წავიდოდა, რომელიც პოლიცის კორდონს ჰქონდა გადაკეტილი კონტრაქციის მონაწილეებისგან გამოსაყოფად.

თბილისი პრაიდის ორგანიზატორების აქცია საათზე მეტია რაც დასრულდა. აქტივისტების წასვლის შემდეგ კონტრაქციის მონაწილეები პოლიციას დაუპირისპირდნენ, რამდენიმე მათგანი დააკავეს.