თბილისი პრაიდის ორგანიზატორებს ჰომოფობიური ჯგუფები საპროტესტო აქციას არ ატარებინებენ. პრაიდის ორგანიზატორებმა დღეს კანცელარიასთან აქცია დააანონსეს, თუმცა ადგილზე მისულებს სხვადასხვა ჰომოფობიური ჯგუფები და სასულიერო პირები დახვდნენ.

კანცელარიის ტერიტორიაზე მობილიზებულია პოლიცია, რომელსაც კორდონი აქვს გაკეთებული. პრაიდის ორგანიზატორების განცხადებით, მათ კანცელარიასთან მისვლის საშუალებას არ აძლევს.

რამდენიმე წუთის წინ ტერიტორიიდან გაიყვანეს ერთ-ერთი ორგანიზატორი გიორგი თაბაგარი. ადგილზე პოლიციელებმა განაცხადეს, რომ მისი გარიდება სურთ. თუმცა, პრაიდის ორგანიზატორი აცხადებს, რომ ის დააკავეს. აღნიშნულთან დაკავშირებით On.ge ელოდება პასუხს შინაგან საქმეთა სამინისტროსგან, რომელსაც მიღებისთანავე შემოგთავაზებთ.

On.ge-ს ჟურნალისტი ადგილიდან იუწყება, რომ კონტრაქციის მონაწილეები გამოირჩევიან აგრესიით, არამხოლოდ აქციის წევრების, ასევე ჟურნალისტების მიმართ. კანცელარიასთან ისმის ჰომოფობიური და შეურაცხმყოფელი განცხადებები.

აქცია სახელად "სახელმწიფო სად ხარ" დღეს დაიგეგმა. ორგანიზატორები აცხადებდნენ, რომ მთავრობის კანცელარიასთან დარჩებოდნენ, ვიდრე აღმასრულებელი და საკანონმდებლო ხელისუფლების წარმომადგენელები: მამუკა ბახტაძე, გიორგი გახარია და ირაკლი კობახიძე საჯაროდ არ გააკეთებდნენ თბილისი პრაიდის გარშემო მიმდინარე მოვლენებზე განცხადებას.