გირჩმა სიტყვის თავისუფლების დაცვის მიზნით ახალი პროექტი დაიწყო. პარტიის ცნობით, იყიდეს ორი დომენი dedistraki.com და mamistraki.com, რომელიც რამდენიმე დღეში გაეშვება.

გირჩის ცნობით, ამ გვერდებზე განთავსდება იმ ადამიანების სია, ვინც გამოდის ინიციატივით ან რაიმე ფორმით მხარს უჭერენ სიტყვის თავისუფლებაზე სახელმწიფო ცენზურის დაწესებას. იქვე იქნება განთავსებული შესაბამისი ციტატები, რომლებითაც დადასტურდება მათი მსგავსი ზრახვები.

"ნებისმიერ ადამიანს, ვინც აცნობიერებს სიტყვის თავისუფლების მნიშვნელობას, შესაძლებლობა ექნება ნებისმიერი გამოხატულების შეურაცხყოფა მიაყენოს ამ სიაში მყოფ ნებისმიერ ადამიანს ან ადამიანებს", — აცხადებენ გირჩში.

გირჩის ცნობით, შეურაცხყოფებს მიიღებენ სპეციალურად ამ მიზნით შექმნილ ელექტრონულ ფოსტის მისამართზე, ვიდეო ან აუდიო ფორმატში: [email protected].

სია იქნება მუდმივად განახლებადი და ეს ვებგვერდი ყოველთვიურად გამოავლენს გამარჯვებულს ორ ნომინაციაში:

1. თვის საუკეთესო გინება (შეურაცხყოფა);
2. თავისუფლების თვის ყველაზე ნაგინები მტერი.

"ჩვენთვის სიტყვის თავისუფლება არის არა უბრალოდ ერთ-ერთი უფლება, არამედ მექანიზმი, რომლითაც ადამიანები ვარკვევთ სწორსა და არასწორს, ტყუილსა და მართალს, მექანიზმი, რომელმაც ადამიანებს მოგვცა ცივილიზაციის არსებული დონე და დღემდე ყველაზე მნიშვნელოვან როლს თამაშობს ამ ცივილიზაციის გადარჩენასა და წინსვლაში", — ამბობენ გირჩში.

მათი განცხადებით, უკანასკნელ პერიოდში სწორედ სიტყვის თავისუფლება დადგა საფრთხის ქვეშ. მას ერჩის საპატრიარქო, პრეზიდენტი, პარლამენტის სპიკერი, ოცნების პარლამენტარები, კომუნიკაციების მარეგულირებელი კომისია და სხვები.

"ცილისწამების, შეურაცხყოფისა თუ ე.წ. "რელიგიური გრძნობების" შეურაცხყოფის დაუშვებლობაზე აპელირებით, ვიღაცებს განზრახული აქვთ შეზღუდონ სიტყვის თავისუფლება ამ ქვეყანაში და ბოლო დღეებში ქმედითი ნაბიჯების გადადგმა დაიწყეს ამ მიმართულებით", — ნათქვამია გირჩის მიერ გავრცელებულ ინფორმაციაში.

კომუნიკაციების კომისიის თავმჯდომარე, კახა ბექაური პარლამენტს მოუწოდებს დააჩქაროს იმ კანონპროექტის განხილვა, რომელიც სიძულვილის ენას, ომის პროპაგანდასა და არასრულწლოვნების მავნე ზეგავლენისგან დაცვას კანონის დონეზე დაარეგულირებს.