რუსული ონლაინგამოცემის Meduza-ს დაკავებული ჟურნალისტი ივან გოლუნოვი სამედიცინო დაწესებულებაში გადაიყვანეს.

Meduza-ს ცნობით, პოლიციის ზედამხედველობის დროს გოლუნოვი შეუძლოდ გახდა, რის გამოც ადგილზე სასწრაფო დახმარების რამდენიმე ეკიპაჟი გამოიძახეს. მათი თქმით, გოლუნოვის გასინჯვის შემდეგ ექიმებმა მას ჰემატომა, ნეკნების სავარაუდო მოტეხილობა და ტვინის შერყევა დაუდგინეს.

გამოცემა წერს, ჟურნალისტი სამართალდამცველებმა მოსკოვში ორი დღის წინ დააკავეს და სცემეს. მას ბრალი დიდი რაოდენობით ნარკოტიკების გასაღების მცდელობაში წაუყენეს. ადვოკატების მტკიცებით, ნარკოტიკული საშუალება გოლუნოვს მანქანაში დაკავების დროს ჩაუდეს.

36 წლის ჟურნალისტი თავისი საგამოძიებო საქმიანობით არის ცნობილი. ის ხშირად მოსკოვის პოლიტიკურ ელიტაში კორუფციის ფაქტებს ამხელდა. გამოცემას სჯერა, რომ მისი დაკავება სწორედ მის საგამოძიებო საქმიანობას უკავშირდება.