გაზგამანაწილებელმა კომპანიამ იმ მომხმარებლების გადამოწმება დაიწყო, რომლებსაც ბოლო 3 თვეში დარღვევით დამონტაჟებული დანადგარების გამო გაზის მიწოდება განმეორებით შეუწყდათ. ამის შესახებ ინფორმაცია ყაზტრანსგაზ-თბილისმა გაავრცელა.

მათივე განცხადებით, 3 545 აბონენტიდან 2 256 აბონენტმა მესამედ, თვითნებურად, კუსტარულად ჩართო საშიში და აკრძალული გაზის დანადგარები ღია კამერიანი წყალგამაცხელებლები, ე.წ. კალონკები და გაზის გამათბობლები, რითაც საფრთხე შეუქმნეს როგორც საკუთარი ოჯახის წევრებს, ისე კორპუსში მცხოვრებ სხვა ადამიანებს.

ყაზტრანსგაზში ამბობენ, რომ აქვთ ახალი პროგრამული მექანიზმი, რომელიც კომპანიის სპეციალისტებს საშუალებას აძლევს ავტომატურად მიიღონ ინფორმაცია, თუ აბონენტი თვითნებურად აერთებს ქსელიდან ჩაჭრილ დანადგარებს.