ქუთაისის საკრებულოს წევრი, ნანა კოსტავა მის მიმართ კრიტიკასთან დაკავშირებით Facebook-ზე წერს, რომ "ეს განსაცდელი საჭირო იყო".

"ქრისტე აღსდგა, მეგობრებო! საჭირო იყო ეს განსაცდელი, ნამდვილი მეგობრების აღმოსაჩენად. ბევრ რამეზე დავფიქრდი, ბევრ რამეს მივხვდი, ბევრი რამ გავაანალიზე", — აღნიშნა კოსტავამ.

On.ge დეპუტატს იმის გასარკვევად დაუკავშირდა, კონკრეტულად რა გააანალიზა. კოსტავამ თქვა, რომ მეგობრებში დარწმუნდა. დამაზუსტებელი კითხვის დასმის შემდეგ აღნიშნა, რომ "ჩვენ მისი მოძღვარი არ ვართ და ამაზე არ მოგვიყვება".

"ახლა გავხსენი ფეისბუქი და "გამიხარდა", ძალიან სასტიკი ყოფილა ქართული საზოგადოება, ძალიან სასტიკი... თქვენ ჩემი მოძღვარი არ ხართ, რა გავაანალიზე და რა არა, ამაზე რომ მოგიყვეთ", — აღნიშნა მან.

კითხვაზე, აპირებს თუ არა საკრებულოს მანდატის დატოვებას, კოსტავამ განაცხადა, რომ კომენტარს არ იძლევა.

კოსტავა ქართულმა ოცნებამ ფრაქციის თავმჯდომარეობიდან 31 მაისს მოხსნა. ამავე დღეს ის გენდერული თანასწორობის საბჭოდანაც გარიცხეს. კოსტავამ თქვა, რომ საკრებულოს 3 ივნისს დატოვებდა, თუმცა სამში განაცხადა, რომ გადაიფიქრა.

ნანა კოსტავამ 30 მაისს Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამავე თემაზე: