პროკურატურის ყოფილი მაღალჩინოსნის, პატიმარ მირზა სუბელიანის ჩანაწერების გავრცელებიდან მე-8 თვეს პროკურატურაში ისევ იმეორებენ, რომ გამოძიება მიმდინარეობს. სუბელიანი ხორავას ქუჩაზე მოზარდების მკვლელობის საქმეზე დანაშაულის დაფარვისთვის არის მსჯავრდებული, თუმცა საპატიმროს, დაახლოებით, ერთ თვეში დატოვებს.

4 მარტს სასამართლომ მას პატიმრობა ერთი წლითა და ერთი თვით შეუფარდა. სასჯელის ათვლა კი მისი დაკავების დღიდან, 2018 წლის 9 ივნისიდან დაიწყო. აუდიოჩანაწერებში სასჯელთან დაკავშირებით ისმის, სავარაუდოდ, მირზა სუბელიანის ხმა, სადაც ის ამბობს:

"ხო ვთქვი ერთი წელი და მომისაჯონ და დამანებონ თავი, რა. აღარ მინდა არც შეღავათი, ხო ვთქვი ერთი წელი, ვიჯდები ის ერთი წელი, დავიღალე, რა, დამანებონ თავი, რა".

წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს.

სავარაუდოდ, სასჯელაღსრულების დაწესებულებაში მომზადებული ჩანაწერი ტელეკომპანია რუსთავი 2-მა 2018 წლის 14 ოქტომბერს გაასაჯაროვა, პროკურატურამ 15 ოქტომბერს გაავრცელა განცხადება, რომ საქმეზე გამოძიება აუდიოჩანაწერის გასაჯაროებამდე ორი დღით ადრე დაიწყო. პროკურორი აცხადებდა, რომ პენიტენციური სამსახურის თანამშრომელს "მირზა სუბელიანის ჩანაწერების" გავრცელების მიზნით აშანტაჟებდნენ.

"12 ოქტომბერს მისთვის [პენიტენციური სამსახურის თანამშრომლისთვის] უცნობი ადამიანი, რომელმაც მასზე მოახდინა შანტაჟი, რომ გაუვრცელებდა პირადი ცხოვრების ამსახველ კადრებს, სანაცვლოდ მას უნდა გაევრცელებინა ის ჩანაწერი... მისთვის უცნობია ადამიანი, რომელმაც გადასცა ეს ჩანაწერი", — განაცხადა პროკურორმა 15 ოქტომბერს.