დღეს, არჩევნების შუალედური შედეგების წარდგენისას, ცესკოს თავმჯდომარემ, თამარ ჟვანიამ რეგისტრაციიდან მოხსნილ და მისამართის გარეშე დარჩენილი ამომრჩევლების სიაში შეყვანის საკითხზე ისაუბრა.

თამარ ჟვანიას განცხადებით, ცესკომ მიიღო გადაწყვეტილება იმისთვის, რომ ამომრჩევლის კონსტიტუციური უფლება არ შეზღუდულიყო და ყველა ამომრჩეველს ჰქონოდა შესაძლებლობა, გამოეხატა საკუთარი ნება.

"აქ გვესწრებიან არასამთავრობო ორგანიზაციები, რომლებსაც საკმაოდ დიდი პრეტენზიები ჰქონდათ რეგისტრაციიდან მოხსნილებისა და მისამართის გარეშე დარჩენილ ამომრჩევლებთან დაკავშირებით. მათი უფლება იზღუდებოდა იმ თვალსაზრისით, რომ ისინი ვერ ხვდებოდნენ ამომრჩეველთა სიაში, იმისთვის, რათა არჩევნებში მიეღოთ მონაწილეობა. საარჩევნოდ რეგისტრირებულ 3 500 000 ამომრჩეველში არიან მისამართის გარეშე მყოფი ამომრჩევლებიც. ისინი არიან შეყვანილი სიაში ფაქტობრივი მისამართის მიხედვით. რეგისტრაციიდან მოხსნილი ამომრჩევლები კი ბოლო რეგისტრაციის მიხედვით არიან შეყვანილი სიაში საარჩევნო მიზნით."

წინასაარჩევნო შუალედური ანგარიში, 8 ივნისიდან 8 სექტემბრამდე პერიოდს მოიცავს და მასში შესულია ის ძირითადი აქტივობები, რასაც ცესკო ახორციელებს.