"ლამის პირველ ადგილზე ვართ კორუფციაში, 100 ქულიდან, არაკორუფციულობის გაზომვა რაც ხდება, 98 ქულა აიღო საქართველომ", - ეს განცხადება ყოფილმა პრემიერმა, ბიძინა ივანიშვილმა გადაცემაში - შეხვედრები რეგიონულ მედიასთან გააკეთა.

მან აღნიშნა, რომ ეკონომიკურ ფორუმზე ერთ-ერთმა ბიზნესმენმა საინტერესო შეფასება გააკეთა:

"გაიხსენა შევარდნაძის პერიოდი და გაიხსენა, რომ კორუფცია იქაც იყო და უფრო ფართო მასშტაბით. მან გაიხსენა ენმ-ს მართვის პერიოდი და თქვა, რომ, რა თქმა უნდა, შევარდნაძისდროინდელი ეკონომიკა იყო გაცილებით საინტერესო. ისიც ცუდი იყო. ხშირად არჩევანს აკეთებენ ცუდი და უარესს შორის, კარგსა და ცუდს შორის. მაშინ (შევარდნაძის დროს) უფრო თავისუფალი იყო გარემო. ის კორუფციული ფული, რაც ძალიან ცუდი იყო, ბევრ ხალხზე ნაწილდებოდა. [ეს ფული] ძალიან ცუდი იყო და სახელმწიფოს ერთ-ერთი ფუნქცია დარღვეული იყო, ბიუჯეტი ვერ ივსებოდა და საბაჟოსა და საგადასახადოში ნაწილდებოდა ძირითადად, ეს ცუდი იყო, ამის შექება როგორ შეიძლება. მაგრამ ამ ბიჭებმა რომ მოაგროვეს ეს ფული, ნაცებმა ისწავლეს, ყველა ჯიბეში ჩაძვრნენ და ისწავლეს ამის გადანაწილება, ეს იყო უარესი მასზე. უფრო ფართო მასებზე ნაწილდებოდა ის ფული, შევარდნაძის პერიოდში ის კორუფცია. უამრავი მოხელე იყო საბაჟოს, უამრავი მოხელე საგადასახადოს. ბიზნესიც ისე არ კონტროლდებოდა, როგორც შემდგომ ნაცებმა ისწავლეს. შემდეგ ამ პატარა ბიჭებმა მოაგროვეს და რამდენიმე კაცზე დაიწყეს გადანაწილება. ეს იყო უარესი - ელიტარული კორუფცია უფრო ანგრევდა ბიზნესის განვითარების პერსპექტივას".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.