ფეისბუქით გავრცელებულ ვიდეოზე, რომელშიც სკოლის მოსწავლეები წითელი ყელსახვევებით გურიაზე მღერიან, განათლების სამინისტრომ მოკვლევა დაიწყო. როგორც On.ge-ს სამინისტროში უთხრეს, აუდიტის სამსახური დაადგენს სად და როდის არის ჩაწერილი გადაღებული.

"ქვეყანაში, რომელსაც აქვს ევროატლანტიკური გეზი, საუბარი საბჭოეთზე არის კატეგორიულად მიუღებელი. განათლების სამინისტრო ყველა მასწავლებელსა და დირექტორს მოუწოდებს, რომ ამ დამამთავრებელი გამოშვევებების დროს ანტისახელმწიფოებრივი მიმართულებები ზეიმებში აღარ გამოიყენონ, მათ შორის წითელი ყელსახვევები, ნამგალი და ურო და ა.შ", — განაცხადეს განათლების სამინისტროში.

გავრცელებულ ვიდეოში ჩანს, რომ სკოლის მოსწავლეები, სავარაუდოდ, გურიის ერთ-ერთ სკოლაში გურიაზე მღერიან და ტოტალიტარული რეჟიმის ბელადს, იოსებ სტალინს ახსენებენ. სიმღერაში ისმის შემდეგი სიტყვები:

გურულს უჩვენა გზა გამარჯვების და დიდ ბრძოლებში გაიყოლია,

მართლაც ამაოდ არ ჩაუვლია, სისხლით შეღებეს დროშა წითელი.

აი გურია, ჩემი გურია, ჩემი გურია განახლებული.

ყველა სოფელი ცას ეჭიდება, სულ საოცნებო არის გურია,

მაგრამ ხიდის თავს აქვს სხვა დიდება, იქ ჯუღაშვილის ნაფეხურია

ეს სასკოლო ზეიმებზე წითელყელსახვევიანი ბავშვების მონაწილეობის პირველი შემთხვევა არაა. ახალციხის, მეხუთე საჯარო სკოლაში პირველი კლასის ზეიმი ჩატარდა, სადაც ბავშვებს თეთრ მაისურებზე წითელი ყელსახვევები უკეთიათ. სამხრეთის კარიბჭის ინფორმაციით, სკოლაში განმარტავენ, რომ მოსწავლეები საქართველოს დროშის ფერებში იყვნენ გამოწყობილები. განათლების სამინისტრომ ამ შემთხვევა მოკვლევა 31 მაისს დაიწყო.