"ჩვენ დავამსხვრიეთ მითები. რა გინდათ ამაზე დემოკრატიული. სწორი მიმართულებით ჩვენ აღმოჩნდით, აი, ამის წინაშე", — ასე გამოეხმაურა მრჩეველთა საბჭოს თავმჯდომარე ნატა იმედაიშვილი მაუწყებლის დირექტორის არჩევნებში თორნიკე მჟავანაძის დამარცხებას. მჟავანაძეს საბჭოს არცერთმა წევრმა არ მისცა ხმა.

აჭარის ტელევიზიის ჟურნალისტის კითხვის პასუხად იმედაიშვილმა განაცხადა, რომ საბჭოს მიმართ არსებული ეჭვები გაქარწყლდა.

"ძალიან ბევრი საუბარი იყო იმაზე, რომ საბჭო იყო მოსყიდული, მიდიოდა კომპრომისებზე ვიღაცეებთან, არ აქვს მნიშვნელობა ვინ არის ერთი-მხარე თუ მეორე, ჩვენ დავამტკიცეთ, რომ ეს არ მომხდარა. საბჭოს გადაწყვეტილება იყო ასეთი, რომ შედეგი ვერ დადგა", — განაცხადა მან.

ინფორმაცია იმის შესახებ, რომ ყოფილ დირექტორი ნათია კაპანაძე შესაძლოა მჟავანაძეს ჩაენაცვლებინა ბათუმელებმა ჯერ კიდევ კონკურსის გამოცხადებამდე გაავრცელა. გამოცემა წერდა, რომ ის ქართული ოცნების აქტივისტია და ავრცელებდა ფოტოს, რომელშიც მას პარტიის მაისური აცვია.

On.ge-სთან საუბარში მჟავანაძემ განაცხადა, რომ მაისური ოცნების აქტივისტებთან ტრენინგების ჩატარების დროს ჩაიცვა. მანვე განმარტა, რომ ქართული ოცნების მიმართ მაშინდელი სიმპათიები გამოწვეული იყო მაშინდელი ხელისუფლების მიმართ არსებული ანტიპათიით.

ჩაშლილი კონკურსი

საზოგადოებრივი მაუწყებლის აჭარის ტელევიზიის მრჩეველთა საბჭომ ახალი დირექტორი ორ ცდაზე ვერ აირჩია და კონკურსი ჩაიშალა. შესარჩევ კონკურსში 8 პირი მონაწილეობდა. პირველ და მეორე კენჭისყრაზე ხმები ერთნაირად გადანაწილდა:

  • მერაბ წულუკიძე — 2 ხმა;
  • შოთა გურაბანიძე — 1 ხმა;
  • ირმა ზოიძე — 1 ხმა;
  • ნათია ზოიძე — 1 ხმა.

მრჩეველთა საბჭოს თავმჯდომარემ კენჭი უყარა მეორე ტურის დანიშვნას, რასაც საბჭოს ყველა წევრი დაეთანხმა. განმეორებითი კონკურსის გამოცხადების მიზნით საბჭოს მომდევნო სხდომა 3 ივნისს ჩაინიშნა. საბჭოს თავმჯდომარემ, ნატა იმედაიშვილმა განმარტა, რომ კონკურსში მონაწილეობის უფლება საქართველოს ნებისმიერ მოქალაქეს აქვს.

აჭარის ტელევიზიის დირექტორის შესარჩევნი კონკურსი მას შემდეგ ჩაინიშნა, რაც მრჩეველთა საბჭომ ყოფილ დირექტორს, ნათია კაპანაძეს იმპიჩმენტი გამოუცხადა.