პარლამენტში ინტერპელაციის ფორმატით მისულმა პრემიერ-მინისტრმა, მამუკა ბახტაძემ არ უპასუხა ოპოზიციის კითხვას ოთხოზორია-ტატუნაშვილის სიის გაფართოების შესახებ. ევროპული საქართველოს დეპუტატმა, სერგი კაპანაძემ პრემიერს ჰკითხა, რუსეთის ფედერაციის რამდენი მოქალაქე შეიყვანეს ოთხოზორია ტატუნაშვილის სიაში.

კაპანაძემ აღნიშნა, რომ სია ერთი წლის წინ შეიმუშავეს და პრემიერმა პირობა დადო, რომ ის გაფართოვდებოდა. მან მოითხოვა ბახტაძეს დაესახელებინა კონკრეტული რაოდენობა და სახელი გვარები იმ ხახლისა, ვინც სიაში შეიყვანეს. ასევე, აეხსნა, თუ რატომ არ გაიზარდა სია.

პასუხად პრემიერმა ოთხოზორია-ტატუნაშვილის სიის საერთაშორისო მხარდაჭერაზე და აღიარების მნიშვნელობაზე ისაუბრა. შემდეგ კი განაცხადა, რომ არსებობს ლეგიტიმური მოლოდინი, რომ ეს სია უახლოეს მომავალში გაიზრდება.

"კიდევ ერთხელ ყველას უნდა გვესმოდეს რა არის მიზანი ამ სიის. ჩვენ უნდა გვქონდეს ბრალდების უმაღლესი სტანდარტი, რომ ჩვენს მეგობრებს ჰქონდეს ყველა ბერკეტი იმისთვის, რომ დაგვეხმარონ ამ სიის იმპლემენტაციაში", — განაცხადა პრემიერმა.

21 მარტს საქართველოს პარლამენტმა რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუცია 106 ხმით დაამტკიცა. რეზოლუციის საწინააღმდეგო ხმა არც ერთ დეპუტატს არ მიუცია, 4 დეპუტატს კი კენჭისყრაში მონაწილეობა არ მიუღია. რეზოლუციის დამტკიცების შემდეგ, საქართველოს მთავრობამ ე.წ. ოთხოზორია-ტატუნაშვილის სიაში 33 კაცი შეიყვანა. სია მოგვიანებით საქართველოს პარლამენტში დაამტკიცეს.

რეზოლუციის პროექტი უმცირესობასა და უმრავლესობას შორის შეთანხმებული ვარიანტია, რომელშიც ასახულია ევროპული საქართველოს ინიციატივა ოთხოზორია-ტატუნაშვილის სიის შექმნის შესახებ.