პატრიოტთა ალიანსის დეპუტატმა, ირმა ინაშვილმა პარლამენტში ინტერპელაციის ფორმატით მისული პრემიერ-მინისტრის მოსასმენად დამტკიცებული რეგლამენტი გააკრიტიკა.

"კროსია, თუ რა არის მე ვერ გავიგე, ქალბატონო თამარ. იმიტომ, რომ 2 წუთში, 3 წუთში, ეს შეურაცხმყოფელია, ასეთი რეჟიმი, როგორც პრემიერისთვის, ასევე პარლამენტისთვის", — განაცხადა მან.

ირმა ინაშვილმა აღნიშნა, რომ ქვეყანაში ბევრი პრობლემაა. მათ შორის, სიღარიბისა და ბავშვების შიმშილობის. მისი თქმით, ასეთი მნიშვნელოვანი საკითხების განხილვას ამ რეჟიმში ვერ ასწრებენ.

ბიუროს დამტკიცებული რეგლამენტი პარლამენტის სხვა წევრებმაც გააკრიტიკეს. პატრიოტთა ალიანსის დეპუტატმა, ადა მარშანიამ პროცედურის ცვლილება მოითხოვა, ხოლო ბიუროზე დამტკიცებული გრაფიკი გადახია.

"წუთნახევრით განსაზღვრა პარლამენტმა ის სტატუსი, რაც დღეს ჩვენს პრემიერ-მინისტრს გააჩნია", — ასე შეაფასა ბიუროს გადაწყვეტილება დამოუკიდებელმა დეპუტატმა, დავით ჭიჭინაძემ.

ოპოზიციის წარმომადგენლების თქმით, კითხვების დასმისთვის ცოტა დროა გამოყოფილი. სხდომის წამყვავნმა, ვიცე-სპიკერმა თამარ ჩუგოშვილმა განაცხადა, რომ ბიუროზე დამტკიცებულ გრაფიკს ვერ შეცვლიდა. ინტერპელაციის ფორმატის ცვლილებისთვის კი დეპუტატებს საკანონმდებლო ცვლილებების რეგისტრაცია შესთავაზა.

ინტერპელაციის ფორმატის ფარგლებში დეპუტატები პრემიერ-მინისტრს, მამუკა ბახტაძეს, ჯანდაცვის მინისტრს, დავით სერგეენკოსა და ცესკოს თავმჯდომარეს, თამარ ჟვანიას მოუსმენენ.