ისრაელის ისტორიაში პირველად ქნესეთის, იგივე პარლამენტის განმეორებითი არჩევნები ჩატარდება, რადგან მმართველი კოალიცია ვერ ჩამოყალიბდა. ახალი არჩევნები მიმდინარე წლის 17 სექტემბერს არის ჩანიშნული.

საპარლამენტო არჩევნები ისრაელში 9 აპრილს გაიმართა. მმართველი კოალიციის ჩამოსაყალიბებლად პრემიერ-მინისტრ ბენიამინ ნეთანიაჰუს დრო 29 მაისის ღამემდე ჰქონდა, თუმცა მოლაპარაკებები ვერ შედგა.

არჩევნების შედეგების მიხედვით, ნეთანიაჰუს პარტიამ ლიკუდ და ახალმა ცენტრისტულმა ბლოკმა კახოლ ლავანმა პარლამენტში 120 მანდატიდან 35-35 მოიპოვეს. სხვა პარტიებთან წინასწარი შეთანხმებებით პრემიერმა პარლამენტში 65 დეპუტატის მხარდაჭერა მოიპოვა. პარლამენტის დაშლის ინიციატივა ნეთანიაჰუმ წამოაყენა, რითაც კახოლ ლავანს კოალიციის ჩამოყალიბების საშუალება დაუბლოკა.

ნეთანიაჰუ კოალიციის შექმნაზე ვერ შეთანხმდა ოპოზიციური პარტიის, ჩვენი სახლი ისრაელიას ლიდერთან, ავიგდორ ლიბერმანთან, რომელიც თავდაცვის ყოფილი მინისტრია. პრემიერი ლიბერმანს ადანაშაულებს, რომ მან სპეციალურად არ მოისურვა კოალიციის ჩამოყალიბება, რათა მორიგ საპარლამენტო არჩევნებში მეტი მანდატი მოეპოვებინა.

ბენიამინ ნეთანიაჰუ ქვეყნის პრემიერ-მინისტრად სექტემბრამდე დარჩება. ის ისრაელის მთავრობას 2009 წლიდან ხელმძღვანელობს.