უკრაინაში მიხეილ სააკაშვილის პარტია რუხ ნოვიხ სილ უმაღლესი რადას ვადამდელ არჩევნებში მონაწილეობის მიღებას აპირებს. ამის შესახებ პარტიის ერთ-ერთმა ლიდერმა, დავით საყვარელიძემ გამოცემა აპოსტროფს განუცხადა.

"ჩვენ არჩევნებში მონაწილეობის ლეგიტიმური უფლება გვაქვს. როგორც პარტია, წავალთ ამ არჩევნებზე და შევეცდებით დავიცვათ ის ფილოსოფია და პროექტები, რომლის განხორციელება გვინდა, როგორც პოლიტიკურ პარტიას", — განაცხადა საყვარელიძემ.

უკრაინის ვადამდელი საპარლამენტო არჩევნები 21 ივლისს ჩატარდება. ქვეყნის ახალმა პრეზიდენტმა, ვოლოდიმირ ზელენსკიმ მიხეილ სააკაშვილს თითქმის ორი წლის შემდეგ ჩამორთმეული მოქალაქეობა დაუბრუნა. სააკაშვილი კიევში დღეს, 29 მაისს ჩაფრინდება.