Facebook-ის განცხადებით, კომპანიამ 2018 წლის ოქტომბრიდან 2019 წლის მარტამდე 3 მილიარდზე მეტი ყალბი ანგარიში წაშალა, რაც ნებისმიერ სხვა პერიოდთან შედარებით რეკორდული მაჩვენებელია. BBC-ს ინფორმაციით, ექვსთვიან პერიოდში სოციალური ქსელიდან სიძულვილის ენის შემცველი 7 მილიონი პოსტი წაშალეს, რაც, ასევე, რეკორდული რიცხვებია.

კომპანიაში აცხადებენ, რომ ეს ანგარიშები, რომლებსაც კომპანია, როგორც წესი, შექმნიდან რამდენიმე წუთში შლის, სპამერების მიერ იმართება. ამ წლის პირველი სამი თვის გამავლობაში ასევე წაიშალა 1,5 მილიონზე მეტი პოსტი, რომელიც ნარკოტიკებსა და იარაღს რეკლამირებას ეხებოდა.

კომპანიამ ახლა პირველად გაასაჯაროვა, მათ მიერ წაშლილი რამდენი პოსტი გაასაჩივრეს მომხმარებლებმა და რამდენი მათგანი აღდგა. მათი თქმით, 2019 წლის პირველ სამ თვეში სიძულვილის ენის გამო წაშლილი პოსტებისთვის მილიონზე მეტი საჩივარი მიიღეს, რომელთაგანაც დაახლოებით 150 ათასი დაკმაყოფილდა.