პირველი ოქტომბრიდან საქართველოს ბანკის სწრაფი გადახდის ტერმინალით სარგებლობა ფასიანი ხდება. ტერმინალებით კომუნალური გადახდები და მობილური ბალანსის შევსება ახალი განაკვეთით დაიბეგრება.

როგორც On.ge-ს საქართველოს ბანკში განუცხადეს, თვითმომსახურების აპარატით საკომისიოს გადახდის შესახებ ბანკმა მომხმარებლის ინფორმირება 1 თვით ადრე დაიწყო:

"აღსანიშნავია, რომ საქართველოს ბანკის ექსპრეს ფეის თვითმომსახურების აპარატებით გადახდის მომსახურებაზე დაწესებული ტარიფი არის ბაზარზე არსებული ტარიფის შესაბამისი. აღსანიშნავია ისიც, რომ ბანკის ნებისმიერი პლასტიკური ბარათით, მაგალითად, მობილური ბალანსის შევსება, არის უფასო".

სწრაფი გადახდის სხვა ტერმინალებს საკომისიო გადასახადი 4 პროცენტის ოდენობით აქვთ. საქართველოს ბანკის თვითმომსახურების აპარატებით სარგებლობისას ამ დრომდე საკომისიო 0 პროცენტი იყო.