"პანკისის საკითხი საერთოდ არ მდგარა იმ მომენტში, ბოლო მომენტამდე, როცა მე იქ ვიყავი", — განაცხადა პარლამენტში გამართულ შეხვედრაზე ეკონომიკის ყოფილმა მინისტრმა, გიორგი ქობულიამ. სწორედ მისი გადაყენებიდან 3 დღეში შევიდა პანკისის ხეობაში პოლიცია.

ქობულიამ აღნიშნა, რომ პანკისში მცირე ზომის ჰესი შენდება და ამ საკითხზე უსიამოვნო სიტუაციის ჩამოყალიბება არაოპტიმალურია, როცა გაცილებით უფრო დიდი ჰესებია ასაშენებელი. მისი თქმით, მთავრობამ უფრო აქტიურად უნდა იმუშავოს ხალხთან და აუხსნას, თუ რა სიკეთეები მოაქვს ამ პროექტებს.

"პირდაპირ ვაცხადებ, რომ აუცილებლად ასაშენებელია, რა თქმა უნდა, გარემოს დაცვის პირობების უმაღლესი სტანდარტების, ევროსტანდარტების გათვალისწინებით...

ერთ-ერთი ძირითადი ინიციატივა ჩვენი მთავრობის მხრიდან, სადაც მე არ ვთვლი, რომ დამაკმაყოფილებლად ვმუშაობთ არის ხალხთან კომუნიკაცია...თუ ჩვენ დემოკრატიული ქვეყანა ვართ, გვჭირდება ხალხთან ძლიერი კომუნიკაციის მექანიზმი", — განაცხადა ქობულიამ.

კომუნიკაციის პრობლემაზე საუბრობდა ეკონომიკის ახალი მინისტრი ნათია თურნავაც, რომლის დანიშვნიდანაც მესამე დღეს შევიდა პანკისში პოლიცია. თურნავამ განმარტა რომ პოლიცია ხეობაში იმ კომპანიის თხოვნის გამო შეიყვანეს, რომელიც მშენებლობას აწარმოებდა.

ეკონომიკის ახალი მინისტრი მიიჩნევდა, რომ ხეობაში ადგილობრივებსა და სამართალდამცავებს შორის მოხდარი დაპირისპირება გაუგებრობაა.

"ამ ინციდენტმა, ამ გაუგებრობამ, ასე ვუწოდებდი მე მას წარმოაჩინა მთელი რიგი ობიექტური პრობლემა. პირველ რიგში, როდესაც ასეთი გაუგებრობა ხდება, რა თქმა უნდა, რა დოზის და რა ძალისხმევის კომუნიკაციაც არ უნდა ყოფილიყო ამის წინ, მაინც მეტი წილი პასუხისმგებლობა ეკისრება სახელმწიფოს", — განაცხადა მინისტრმა იმედი LIVE-ის ეთერში.

დაპირისპირება პანკისი ხეობაში

21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივებმა მდინარე ალაზანზე მშენებარე ჰესზე ტექნიკის შესვლა გააპროტესტეს, რასაც იქ მობილიზებულ პოლიციასთან დაპირისპირება მოყვა. როგორც შინაგან საქმეთა სამინისტროში განმარტეს, დილას სოფელში პოლიცია ეკონომიკის სამინისტროს მიმართვის საფუძველზე შეიყვანეს, სპეცდანიშნულების რაზმები კი დაპირისპირების გამო დაამატეს.

ჰესების საკითხზე სალაპარაკოდ თელავში მთავრობისა და ადგილორივების წარმომადგენლებს შორის შეხვედრა გაიმართა, თუმცა პარალელურად პანკისში ვითარება დაიძაბა. სპეცრაზმმა აქციის მონაწილეების წინააღმდეგ ორჯერ ცრემლსადენი გაზი და რეზინის ტყვიები გამოიყენა. ადგილობრივებმა კი პოლიციას ქვები და ხელკეტები დაუშინეს. შსს-ს განცახდებით, შედეგად დაშავდა 55 ადამიანი, მათ შორის 38 სამართალდამცავი.

რამდენიმე საათში შემთხვევის ადგილას მთავრობის წარმომადგენლები ჩავიდნენ. შინაგან საქმეთა მინისტრმა, გიორგი გახარიამ თემის უხუცესებთან შეხვედრის შემდეგ განაცხადა, რომ ჰესი მანამ არ აშენდება, სანამ მოსახლეობის 90%-ს არ ექნება ამის სურვილი.

მთავრობის ადმინისტრაციამ დაპირისპირების შემდეგ განცხადება გაავრცელა, რომელშიც ჰესების სარგებლიანობაზე ისაუბრეს. მათი თქმით, საჭირო იყო ამ ინფორმაციის ადგილობრივებისთვის მიწოდება.