სამეფო კარის თამაშების მეხუთე ეპიზოდმა ფანებში დიდი ვნებათაღელვა გამოიწვია. თუმცა ამჯერად არა პერსონაჟების სახეცვლილებაზე, არამედ ჯეიმი ლანისტერის ოქროს ხელზე ვისაუბრებთ.

ფრთხილად, წინ სპოილერებია!

ფოტო: HBO

ჯეიმისა და სერსეის გულმხურვალე ჩახუტებას ფანების დიდი ნაწილი ელოდა, თუმცა ეს სცენა ერთმა დეტალმა, ჯეიმის ხელმა გადაფარა. მეხუთე ეპიზოდის გამოსვლის შემდეგ ინტერნეტში გავრცელდა ფოტო, სადაც ჯეიმის მარჯვენა ხელი "გაზრდილი" აქვს. თუ გავიხსენებთ ჯეიმის ხელი მესამე სეზონში მოაჭრეს და მას შემდეგ ოქროს ხელი უკეთია.

ფანების დიდი ნაწილი ამ გაპარულმა "შეცდომამ" გააბრაზა. ისინი წერდნენ, რომ სტარბაქსის ეპიზოდის ერთი კვირის თავზე მსგავსი რამ აღარ უნდა შეშლოდათ.

თუმცა ყველას გულის გასახარებლად უნდა ითქვას, რომ აღნიშნული კადრი მეხუთე ეპიზოდში საერთოდ არ ყოფილა. თუ თავიდან გადავხედავთ სერსეისა და ჯეიმის შეხვედრის სცენას დავინახავთ, რომ ჯეიმის ხელი ისევ ოქროსია.

ფოტო: HBO

მაგრამ ახლა მთავარი კითხვაა საიდან გაჩნდა ფოტო ხელით? ყოველ კვირას ახალი სერიის გამოსვლის შემდეგ HBO ფოტოებს აქვეყნებს. მიუხედავად იმისა, რომ ჯეიმისა და სერსეის ჩახუტების ფოტო ვებგვერდზე უკვე აღარ დევს, ვებგვერდის ქეში აჩვენებს, რომ ფოტო ნამდვილად იყო გამოქვეყნებული. გარდა ამისა, შოუს ფოტოგრაფმა ჰელენ სლოუნმა BuzzFeed-ს განუცხადა, რომ ფოტოების დიდი ნაწილი გადასაღებ მოედანზე კომპიუტერული გრაფიკის დადებამდეა გადაღებული.

ფოტო: WaybackMachine

ასე რომ, შენიშვნა იმაზე, რომ HBO-ს ეთერში კიდევ ერთი კადრი გავიდა შეცდომით, სიმართლეს არ შეესაბამება.