მთაწმინდის მაჟორიტარი კანდიდატის შუალედურ არჩევნებში შენების მოძრაობის ლიდერი და ყოფილი საპრეზიდენტო კანდიდატი დავით უსუფაშვილი შალვა შავგულიძეს უჭერს მხარს. ევროპული საქართველოს ინფორმაციით, უსუფაშვილი შავგულიძესთან ერთად მოსახლეობას შეხვდა.

"მე მოსახლეობას ვუთხარი, რომ შალვას არჩევა კი არაა სწორი პარლამენტში შალვას პარლამენტიდან გამოშვებაა არასწორი, მას უნდა მივუსაჯოთ პარლამენტის წევრობა, ის სჭირდება ქვეყანას და პარლამენტს", — განაცხადა უსუფაშვილმა.

შალვა შავგულიძის კანდიდატურა მთაწმინდის შუალედურ არჩევნებში ევროპულმა საქართველომ და თავისუფალმა დემოკრატებმა წამოაყენეს.

19 მაისს 8 მუნიციპალიტეტის საკრებულოების შუალედური და 5 მუნიციპალიტეტის მერების რიგგარეშე არჩევნები გაიმართება. ამავე დღეს გაიმართება მაჟორიტარული საარჩევნო სისტემით №1 მაჟორიტარულ საარჩევნო ოლქში საქართველოს პარლამენტის შუალედური არჩევნები.

საკრებულოების შუალედური არჩევნები საგარეჯოს, ახმეტის, ადიგენის, ზესტაფონის, ჭიათურის, ტყიბულის, წყალტუბოსა და ოზურგეთის მუნიციპალიტეტების მაჟორიტარულ საარჩევნო ოლქებში გაიმართება. მერის არჩევნები კი მარნეულის, ზესტაფონის, ჭიათურის, ზუგდიდისა და ხულოს მუნიციპალიტეტებში ჩატარდება.