როგორც კარლ სეიგანმა ერთხელ აღნიშნა, კვანტური მექანიკა იმდენად უცნაური რამაა, რომ მის შესაცნობად საღი აზრის გამოყენება უაზრობაა. მეცნიერებმა ჯერ კიდევ არ იციან, რატომ იქცევა მატერია კვანტურ დონეზე უცნაურად.

ერთ-ერთი მთავარი სფერო, რაშიც შეიძლება კვანტური მექანიკის ცოდნა დაგვეხმაროს, გამომთვლელი მანქანების აწყობაა. თანამედროვე ელექტრონულ კომპიუტერებთან შედარებით, კვანტური კომპიუტერები ბევრად სწრაფები, ძლიერები და ეკონომიურები იქნება.

მიუხედავად იმისა, რომ ასეთი კომპიუტერების შექმნა, ჯერჯერობით, მხოლოდ თეორიაშია შესაძლებელი, მეცნიერებმა ნელნელა დაიწყეს იმ ტექნოლოგიებზე, მეთოდებსა და მასალებზე მუშაობა, რომელიც ამ ფანტასტიკურ მანქანას დასჭირდება.

კვანტური კომპიუტერის აწყობა თანამედროვე ტექნოლოგიებში დიდი ნახტომი იქნება - ასეთი კომპიუტერი ბევრად უკან ჩამოიტოვებს თანამედროვე სუპერკომპიუტერებს. ამიტომ, სულაც არაა გასაკვირი, რომ IBM, Intel და Google უზარმაზარ თანხებს დებენ საკუთარი კვანტური ლაბორატორიების შექმნაში. მათ არც სტარტაპები, ბანკები და სამთავრობო სააგენტოები ჩამორჩებიან. აშშ-ის ნაციონალური უსაფრთხოების სააგენტო უკვე წლებია საკუთარი კვანტური კომპიუტერის შექმნას ცდილობს. მათი აზრით, ასეთი კომპიუტერი ჰაკინგში და კოდების გატეხვაში შეუცვლელი იქნება.

კვანტური კომპიუტერების ეს თვისება სახიფათოც კია თანამედროვე უსაფრთხოების სისტემებისთვის. თუ ჩვენი კომპიუტერები უსაფრთხოების პროტოკოლებს იმის გამო ვერ ტეხავენ, რომ ამას მათთვის დიდი დრო და ბევრი ოპერაცია სჭირდება, მათი კვანტური ბიძაშვილებისთვის თანამედროვე უსაფრთხოების სისტემები საერთოდ არ იქნება ბარიერი.

ამ საფრთხის აღმოსაფხვრელად პროგრამისტები და სტარტაპები უკვე მუშაობენ. Google-იც კი ცდილობს ქრომისთვის “კვანტურ-გამძლე” დაშიფრვის მინიჭებას. თუმცა, ეს ყველაფერი ჯერ ფანტასტიკის სფეროა.