ვინ უფრო კარგად შეძლებს რუსეთთან ურთიერთობების დალაგებას - ამ თემაზე თოფაძისა და ბურჯანაძის პარტიების მარნეულის მაჟორიტარი დეპუტატობის კანდიდატებს შორის ქვემო ქართლის ტელევიზიის პირდაპირ ეთერში დაწყებული კამათი ხელჩართულ ჩხუბში გადაიზარდა.

ერთმანეთს დაუპირისპირდნენ ბურჯანაძის პარტიის წარმომადგენელი ვეფხია გურგენიშვილი და თოფაძის პარტიის წევრი ფოლად ხალილოვი.

თავდაპირველად, კამათი ბიძინა ივანიშვილზე საუბარს მოჰყვა. ფოლად ხალილოვმა განაცხადა, რომ "ბიძინა ივანიშვილი ქართული სახელმწიფოს აღმშენებელია", რაზეც ოპონენტმა უპასუხა, რომ "ეს არის თოფაძის რეალური სახე" და რომ ისინი, რეალურად ისევ ივანიშვილის მხარდამჭერები არიან. კამათი უფრო გამწვავდა რუსეთთან ურთიერთობის აღდგენაზე საუბრისას.

ვეფხია გურგენიშვილის თქმით, რუსეთთან ყველაზე კარგად ურთიერთობებს ნინო ბურჯანაძე დაალაგებს:

"მე არ მჯერა, რომ საქართველოში არსებობს თუნდაც ერთი ადამიანი, რომელსაც ესმის დიპლომატია და სჯერა, რომ თოფაძე უფრო დაალაგებს რუსეთთან ურთიერთობას, ვიდრე ნინო ბურჯანაძე".

ამის შემდეგ გადაცემის სტუმრებმა ერთმანეთს აგინეს და ფიზიკური შეურაცხყოფაც მიაყენეს. წამყვანის არაერთი მოთხოვნის მიუხედავად, ისინი, ძირითადად, რუსულად კამათობდნენ. საბოლოოდ, ჩხუბის გამო ქვემო ქართლის ტელევიზიაში 21 სექტემბრის საარჩევნო დებატები შეწყდა.