დავით უსუფაშვილმა ტელეკომპანია რუსთავი 2-თან ინტერვიუში განაცხადა, რომ ბიძინა ივანიშვილსა და მიხეილ სააკაშვილს სახელმწიფოს განვითარების ერთნაირი ხედვა აღმოაჩნდათ. უსუფაშვილის განმარტებით, მან მსგავსება დაინახა ქვეყნის მართვის სტილთან და პოლიტიკური სისტემის ჩამოყალიბებასთან მიმართებაში:

"დღევანდელ ვითარებაში ბიძინა ივანიშვილი კონკრეტული პოლიტიკური პარტიის მხარდამჭერია. ამ პარტიის გამარჯვებისთვის ზრუნავს, ამისთვის ატარებს კამპანიას და გაცილებით აქტიურს, ვიდრე ქართული ოცნების რომელიმე სხვა ლიდერი. თავისთავად, ოპონირება მიწევს მასთან. მისგან გავიგეთ, რომ ქართულ ოცნებას 2/3 რაოდენობა სჭირდება პარლამენტში, რომ რეფორმირების პროცესი სწრაფად წავიდეს. ეს კონცეფცია გაჭრილი ვაშლივით ჰგავს მიხეილ სააკაშვილისას. მან მაშინაც ასე თქვა, ყოფილი პარტნიორები აღარ მინდა, აგერ არიან მაჟორიტარები, შევარდნაძის ხელისუფლების წარმომადგენლები, რომლებიც მივიდნენ და შეჰფიცეს ერთგულება და ამათი მეშვეობით ავაშენებ უკეთეს საქართველოსო. იგივეს გვეუბნება ბიძინა ივანიშვილი".

უსუფაშვილმა ასევე გაიხსენა ისიც, რომ ბიძინა ივანიშვილი ოთხი წლის განმავლობაში, 2003-დან 2008 წლამდე რჩევებს აძლევდა მიხეილ სააკაშვილს:

"როგორც ჩანს არის რაღაც საკითხები, რომელზეც ისინი იზიარებდნენ ერთმანეთის ხედვებს, იმის თაობაზე, თუ როგორ უნდა იმართებოდეს სახელმწიფო".