სახელმწიფო აუდიტის სამსახურმა პარტია გირჩის წინააღმდეგ სასამართლოს სანქციისთვის მიმართა. უწყების ცნობით, პარტიამ არ წარმოადგინა საარჩევნო პერიოდში საარჩევნო კამპანიის ფონდისა და შემოწირულობების შესახებ ინფორმაცია. დოკუმენტაციის წარდგენის ბოლო ვადა აპრილის დასაწყისში იყო.

გირჩის წევრმა იაგო ხვიჩიამ On.ge-სთან საუბარში აღნიშნა, რომ ისინი მათივე ძველი პირობის ერთგული რჩებიან. იაგო ხვიჩიას თქმით, აუდიტის სამსახურმა ჯერ უნდა გამოიძიოს "ბიძინა ივანიშვილის მიერ ამომრჩევლის მოსყიდვის ფაქტი".

"თუ ძალით არ მიგვიყვანეს, ჩვენ ნებით მურუსიძის სასამართლოში არ მივალთ... აუდიტის სამსახურს მორალური უფლება არ აქვს არსებობის. მას მერე, რაც ბიძინა ივანიშვილმა მოისყიდა ფაქტობრივად საქართველოს ამომრჩევლები, აუდიტში საკუთარ თავს უნდა ხურავდნენ და სახლში მიდიოდნენ. ასეთ რეალობაში, რომ სახე შეინარჩუნო და ხელფასი რომ აიგო, თითქოს რამეს აკეთებ, გირჩი როარ გაბარებს დეკლარაციას შემოსავალზე, რომელიც არ ჩარიცხვია ფაქტობრივად, ამას ვუყურებთ, როგორც უკიდურესად არასერიოზულს", — აცხადებს იაგო ხვიჩია.

მისივე განცხადებით, თუკი მათ სანქციას დააკისრებს სასამართლო, არ გადაიხდიან.

დეკლარაციის წარდგენის შესახებ პარტიამ 8 აპრილს გაავრცელა განცხადება. მაშინ მათ ულტიმატუმი წაუყენეს აუდიტის სამსახურს და განაცხადეს, რომ საარჩევნო დეკლარაციას იმ შემთხვევაში გაუგზავნიან, თუ საქართველოს საპატრიარქოს აუდიტს ჩაატარებენ.

გირჩს მიაჩნია, რომ ე.წ. პოლიტიკური ფინანსების ეფექტური მონიტორინგი ზოგადად არის შეუძლებელი.

"საქართველოში ეს სისტემა შემუშავებულია სპეციალურად ერთი კონკრეტული მიზნისთვის - რომ ოპოზიციურად განწყობილმა პოლიტიკურმა ძალებმა ვერ შეძლონ ხელისუფლებაში მოსასვლელად საჭირო ფინანსური რესურსის მობილიზება. არასოდეს ამ ქვეყნის ისტორიაში ამ სისტემას არ დაუსჯია რეალურად ხელისუფლებაში მყოფი პოლიტიკური ძალა და თუ ვინმესთვის ოდესმე შეუქმნია რეალური პრობლემა, ეს ყოველთვის იყო ოპოზიციურად განწყობილი პოლიტიკური ძალები", — ნათქვამია განცხადებაში.