შინაგან საქმეთა სამინისტროს ინფორმაციით, აჭარაში განსაკუთრებით დიდი ოდენობით ნარკოტიკული საშუალებების უკანონო შეძენა-შენახვის ბრალდებით ორი პირი დააკავეს. უწყების ცნობით, ერთ-ერთი დაკავებულის პირადი ჩხრეკისას 322 აბი ექსტაზი, 12 გრამამდე კოკაინი და 9 გრამამდე ჰეროინი ამოიღეს. ხოლო მეორეს — 100 აბი მეტადონი.

გამოძიება სისხლის სამართლის კოდექსის 260-ე მუხლის მეექვსე ნაწილის "ა" ქვეპუნქტით მიმდინარეობს, რაც განსაკუთრებით დიდი ოდენობით ნარკოტიკული საშუალებების უკანონო შეძენა-შენახვას გულისხმობს. დანაშაული რვიდან ოც წლამდე ან უვადო პატიმრობას ითვალისწინებს.