სპორტსმენი თათია ლორთქიფანიძე ძალოსან ქალთა ნაკრების მთავარ მწვრთნელს სექსუალური შევიწროების, ხოლო ძალოსანთა ფედერაციას დისკრიმინაციის ბრალდებით სასამართლოში უჩივის. მის ინტერესებს ორგანიზაცია საფარი დაიცავს.

საქმეში 2 მოპასუხეა: მთავარი მწვრთნელი თემურ ჯანჯღავა, რომელსაც ის სექსუალურ შევიწროებაში სდებს ბრალს და ძალოსანთა ფედერაცია, რომელმაც, ლორთქიფანიძის თქმით, დისკრიმინაციული ქმედება ჩაიდინა და ის ბათუმში მიმდინარე ევროპის ჩემპიონატიდან მოხსნა. ძალოსანი მორალური და მატერიალური ზიანის ანაზღაურებას მოითხოვს.

"იმიტომ ამოვიღე ხმა, რომ მე ვალდებული ვიყავი ჩემი თავი დამეცვა, მიმემართა ადვოკატისთვის, რომ გამართულიყო სასამართლო და ჩემი სიმართლე დამემტკიცებინა. ეს ჩემპიონატი ჩემთვის მნიშვნელოვანი იყო კარიერული წინსვლისთვის და დიდი პერსპექტივა იქნებოდა. მე სასამართლოში მოვითხოვ მორალური და მატერიალური ზიანის ანაზღაურებას", — თქვა ლორთქიფანიძემ.

საფარის ხელმძღვანელი, ბაია პატარაია თვლის, რომ სექსუალური შევიწროების ინციდენტი და სპორტსმენის ჩემპიონატიდან მოხსნა ერთმანეთს უკავშირდება.

"დღემდე არ მიგვიღია პასუხი, რა შეიძლებოდა ყოფილიყო თათიას ჩემპიონატიდან მოხსნის რეალური მიზეზი. ამ ერთი თვის განმავლობაში ფედერაციას არ უსაუბრია მედიასთან ამ საკითხზე, რაც კიდევ უფრო აღრმავებს ჩვენს ეჭვს, რომ ეს ორი ინციდენტი ერთმანეთთან კავშირშია", — განცხადა პატარაიამ.

9 აპრილს გამართულ პრესკონფერენციაზე ძალოსანმა თათია ლორთქიფანიძემ ქალთა ნაკრების მწვრთნელი თემურ ჯანჯღავა სექსუალურ შევიწროებასა და დისკრიმინაციაში დაადანაშაულა.