საქართველოს მთავარი პროკურატურა მსახიობ ლევან ჯიბღაშვილის გირაოს შუამდგომლობაზე განმარტებას ავრცელებს და ამბობს, რომ დადგენილი პრაქტიკის მიხედვით იმოქმედა.

უწყებაში აცხადებენ, რომ როდესაც პირს წარდგენილი აქვს ბრალდება საქართველოს სისხლის სამართლის კოდექსის 260 მუხლის 1, 2 ან 3 ნაწილით, არ არის ნასამართლევი, აღიარებს ჩადენილ დანაშაულს და არ იკვეთება ნარკოტიკული საშუალების გასაღება პროკურატურა აღკვეთის ღონისძიებად გირაოს შუამდგომლობას აყენებს.

"რაც შეეხება ნარკოტიკული საშუალების შეძენას, შენახვას და გასაღებას, საქართველოს სისხლის სამართლის კოდექსის 260-ე მუხლის 4, 5 ან 6 ნაწილს, როდესაც საქმეში მტკიცებულებებით უტყუარად დასტურდება ნარკოტიკული საშუალების გასაღების ფაქტი ან პირს აღმოაჩნდება განსაკუთრებით დიდი ოდენობით ნარკოტიკული საშუალება, საქართველოს პროკურატურა, ასევე დადგენილი პრაქტიკის მიხედვით, სასამართლოს წინაშე შუამდგომლობს საპატიმრო აღკვეთის ღონისძიების შეფარდების მოთხოვნით", — აღნიშნულია პროკურატურის განცხადებაში.

ლევან ჯიბღაშვილის ნარკოდანაშაულის ბრალდებით დაკავების შესახებ ინფორმაცია 22 აპრილს გავრცელდა. მას ბრალი სისხლის სამართლის კოდექსის 260-ე მუხლის პირველი ნაწილით წარედგინა, რაც ნარკოტიკული საშუალების უკანონო შეძენა-შენახვას გულისხმობს. ჯიბღაშვილს აღკვეთის ღონისძიების სახით 10 000-ლარიანი გირაო შეეფარდა. გირაოს შუამდგომლობა პროკურატურამ დააყენა.

მსახიობის ადვოკატის განცხადებით, ჩანთა, რომელშიც ნარკოტიკული საშუალება იპოვეს ბრალდებულს ეკუთვნოდა. მისივე თქმით, ჯიბღაშვილი ბრალს აღიარებს და გამოძიებასთან თანამშრომლობს.

ორი დღის განმავლობაში არც პროკურატურა, არც შინაგან საქმეთა სამინისტრო და არც ბრალდებულის ადვოკატი მანქანიდან ამოღებული ნარკოტიკული საშუალების ოდენობასა და სახეობას. 24 აპრილს შსს-მ განაცხადა, რომ ჯიბღაშვილის მანქანიდან 0,5659 გრამი კოკაინი და 0,1921 გრამი ექსტაზი (MDMA) ამოიღეს.