საფინანსო-საბიუჯეტო კომიტეტის სხდომაზე საპენსიო სისტემასთან და გადასახადებთან დაკავშირებით ფინანსთა მინისტრმა ივანე მაჭავარიანმა და ევროპული საქართველოს დეპუტატმა გიგა ბოკერიამ იკამათეს.

გიგა ბოკერია დაინტერესდა, "რატომ არის ამ მთავრობის, წინა ეკონომიკის მინისტრის, ამ ფინანსთა მინისტრის ლოზუნგი, გნებავთ საპენსიო შენატანზე, გნებავთ დედოლარიზაციაზე, რომ ხალხს ელაპარაკებიან და ეუბნებიან, რომ მოიქეცით როგორც ჩვენ გეუბნებით და არა ისე, როგორც ჩვენ ვიქცევით".

დეპუტატმა იკითხა, რატომ არის "ასეთი ცინიკური და ფარისევრული მორალი, რომლის მიხედვითაც: ჩვენზე უკეთ დახარჯავს ხელისუფლება ჩვენს ფულს, რომ მთავრობა ჩვენზე უფრო ჭკვიანია და ჩვენ ვართ ბავშვები, რომლებზეც მათ უნდა იზრუნონ".

ფინანსთა მინისტრის ივანე მაჭავარიანის თქმით, თუ გადასახადი 0,1 ან 0,2 პროცენტით იზრდება ცუდი არ არის, რადგან "ადმინისტრაციის ხარჯზე ჩრდილოვანი ეკონომიკა მცირდება".

"მე რომ თქვენნაირი პოპულისტი ვიყო ვიტყოდი, რომ თქვენ დროს გაიზარდა ტვირთი-მეთქი. 12 პროცენტიდან 24 პროცენტამდე რომ ავიდა, არ გსაყვედურობთ და 25,5 პროცენტიდან რომ 25,6 პროცენტამდე ავიდა მაგას ეძახი რომ გადასახადი გავზარდე?", — უპასუხა ბოკერიას ივანე მაჭავარიანმა.

ამის შემდეგ გიგა ბოკერიამ მაჭავარიანს საპენსიო რეფორმაზე განმარტებების გაკეთება სთხოვა და დაინტერესდა "უზრდის თუ არა ხარჯს საპენსიო რეფორმა ადამიანებს და გადასახადს დამსაქმებელს".

ივანე მაჭავარიანმა ბოკერიას პასუხად თქვა, რომ თუ საპენიოს სისტემა თუ სავალდებულო არ გვექნება განწირულები ვიქნებით დაბალი პენსიისთვის.

"დაგროვებითი პენსია ნიშნავს, რომ დავაზღვიოთ სამომავლოდ გადასახადების ზრდა, რომ მომავალ მთავრობებს, თქვენნაირი პოპულისტების ზეწოლის ქვეშ რომ იქნებიან, ხელი არ გაექცეთ და გადასახადები არ გაზარდონ. დაგროვებითი საპენსიო სისტემაზე გადასვლა ნიშნავს მომავალში გადასახადების ზრდის პრევენციას. ის გავს გადასახადს მოგროვების თვალსაზრისით, რადგან სავალდებულოა და მიბმულია ხელფასზე. ის არ არის ფუნდამენტურად გადასახადი და ამაშია მთელი მარილი. ის არ მიემართება იმ მიზნებისთვის, რასაც კლასიკური გადასახადი წარმოადგენს", — განაცხადა ფინანსთა მინისტრმა.

გიგა ბოკერიამ დაზუსტებისკენ მოუწოდა მინისტრს და კიდევ ერთხელ ჰკითხა "უზრდის თუ არა ხარჯს ეს საპენსიო რეფორმა ადამიანებს". გიგა ბოკერიას თქმით, მან პასუხი ვერ მიიღო და მინისტრი დროს წელავდა. შემდგომ, ფინანსთა მინისტრმა თქვა, რომ ეს პოლიტიკა საბოლოოდ გაზრდის სამუშაო ადგილებს პირველივე წლიდან.

"ბიძინაზე უფრო ოპტიმისტია", — ასე უპასუხა გიგა ბოკერიამ ფინანსთა მინისტრს.