თბილისის საკრებულომ ქართული ოცნების დეპუტატ ბექა ოდიშარიასთვის მიწის გადაცვლას მხარი დაუჭირა. შეთანხმების თანახმად, ოდიშარიას თაბორის მთაზე 3 ათასი კვ.მ მიწის სანაცვლოდ მუხიანში 35 ათასი კვ.მ მიწა გადაეცემა. ინიციატივას მხარი 30-მა დეპუტატმა დაუჭირა, წინააღმდეგ კი 6 იყო.

ოდიშარიას მიწის გადაცვლა თბილისის მერიამ შესთავაზა. მერიაში ამტკიცებენ, რომ გასაცვლელ მიწის ნაკვეთებს ერთნაირი ღირებულება აქვს.

შეთანხმება საკრებულოში ნაციონალური მოძრაობის წევრმა, ლევან ხაბეიშვილმა გააპროტესტა. მისი თქმით, ბექა ოდიშარია 212 ათას ლარად შეძენილ მიწის ნაკვეთში დღეს 5 მილიონ 600 ათას ლარის ქონებას იღებს.

ხაბეიშვილის საპასუხოდ თბილისის საკრებულოს ურბანული დაგეგმარების და საქალაქო მეურნეობის კომისიის თავმჯდომარე რევაზ სოხაძემ თქვა, რომ ოპოზიცია ციფრებით აპელირებს, რაც უსაფუძვლოა.

"აქ უბრალო მათემატიკაა, რომ ქალაქის ცენტრალურ ნაწილში მიწა გაცილებით ძვირი ღირს, ვიდრე გარეუბნებში და ოპოზიციის განცხადებები ამასთან დაკავშირებით, უსაფუძვლოა. თაბორის მიმდებარე ტერიტორიაზე მიწის მონაცვლეობა ხორციელდება მუხიანში მიწის ნაკვეთზე, რაც თავისთავად იწვევს ფასთა სხვაობას", — თქვა სოხაძემ.

მისივე განცხადებით, მიწის შეფასებას სამხარაულის ექსპერტიზის ეროვნული ბიურო ახდენს, ამიტომ მერიისკენ ან საკრებულოს მხარეს ხელის გაშვერა მიზანშეწონილი არ არის.