ეკონომიკის ახალი მინისტრი ნათია თურნავა პრემიერ-მინისტრმა, მამუკა ბახტაძემ მთავრობის სხდომის დაწყების წინ ოფიციალურად წარადგინა. ნათია თურნავამ განაცხადა, რომ მათ აქვთ კონკრეტული ხედვა, დავალებები და კონკრეტულ ვადებში შესასრულებელი საქმეები.

"ჩემთვის დიდი პატივია, სათავეში ჩავუდგე ეკონომიკის და მდგრადი განვითარების სამინისტროს. ეს ის სამინისტროა, რომელსაც მე ძალიან კარგად ვიცნობ. ეს ის სამინისტროა, სადაც ძალიან მაღალი რანგის პროფესიონალები არიან დასაქმებულები", — განაცხადა თურნავამ.

მან მადლობა გადაუხადა პრემიერ-მინისტრს ნდობისთვის. გარდა ამისა, მან თანამშრომლობისთვის მადლობა გადაუხადა ყოფილ მინისტრს, გიორგი ქობულიას.

პრემიერი-მინისტრმა მამუკა ბახტაძემ გიორგი ქობულია ეკონომიკის მინისტრის თანამდებობიდან 18 აპრილს საღამოს გადააყენა. ამავე საღამოს ახალ მინისტრად პრემიერმა ქობულიას მოადგილე, ნათია თურნავა დანიშნა.

ქობულიას სამომავლო გათავისუფლების შესახებ ინფორმაცია რამდენიმე დღის წინ გავრცელდა, თუმცა ყოფილი მინისტრი კითხვებზე პასუხს არ სცემდა. 18 აპრილს კი მან განაცხადა, რომ მის გადაყენებასთან დაკავშირებით კითხები პრემიერ-მინისტრის მიმართ უნდა დასმულიყო.