აეროპორტების გაერთიანების ინფორმაციით, 2019 წლის მაისიდან განახლდება სეზონური რეისების შესრულება თბილისის საერთაშორისო აეროპორტიდან სალონიკისა და კუნძული კრეტას მიმართულებით. უწყების განცხადებით, ბერძნული ავიაკომპანია Ellinair-თან მოლაპარაკებები წარმატებით დასრულდა.

თბილისი-სალონიკი-თბილისის მიმართულებით ფრენა ბოინგ 737 – 30 ტიპის თვითმფრინავებით 21 მაისიდან 17 სექტემბრამდე კვირაში ერთხელ, ყოველ სამშაბათს განხორციელდება. აეროპორტების გაერთიანების ინფორმაციით, ბილეთის ღირებულება ერთი მიმართულებით 305 ლარიდან დაიწყება.

17 ივნისიდან თბილისის საერთაშორისო აეროპორტიდან რეისები კუნძული კრეტას მიმართულებით დაინიშნება. ჰერაკლიონის მიმართულებით რეისები ათდღიანი სიხშირით, Airbus A320 ტიპის თვითმფრინავით 30 სექტემბრამდე შესრულდება. ბილეთის ფასი ერთი მიმართულებით 465 ლარიდან იქნება. ორივე მიმართულებაზე ბილეთის ღირებულებაში 20 კგ ბარგი, 8 კგ ხელბარგი და ბორტზე კვება შედის.