პარლამენტში დარგობრივი ეკონომიკის კომიტეტის თავმჯდომარის, რომან კაკულიას თქმით, გიორგი ქობულიამ ეკონომიკის სრულყოფილ მინისტრად ჩამოყალიბება ვერ მოასწრო.

"ამას მაინც და მაინც კრიტიკით არ ვამბობ მის მიმართ. ძალიან დიდი სამინისტროა. მისთვის ეს გარემო თავისთავად ცხადია ცოტა უცხო იყო, ის სხვა ქვეყნიდან ჩამოვიდა", — განაცხადა კაკულიამ.

პრემიერი-მინისტრმა მამუკა ბახტაძემ გიორგი ქობულია ეკონომიკის მინისტრის თანამდებობიდან 18 აპრილს საღამოს გადააყენა. ამავე საღამოს ახალ მინისტრად პრემიერმა ქობულიას მოადგილე, ნათია თურნავა დანიშნა.

ქობულიას სამომავლო გათავისუფლების შესახებ ინფორმაცია რამდენიმე დღის წინ გავრცელდა, თუმცა ყოფილი მინისტრი კითხვებზე პასუხს არ სცემდა. 18 აპრილს კი მან განაცხადა, რომ მის გადაყენებასთან დაკავშირებით კითხები პრემიერ-მინისტრის მიმართ უნდა დასმულიყო.