გირჩი მთაწმინდის მაჟორიტარულ არჩევნებში მოქალაქეებს ხმის სანაცვლოდ გარკვეულ ანაზღაურებას სთავაზობს. პარტიის ლიდერის, ზურა ჯაფარიძის თქმით, ხმებს ისინი თავიანთი კრიპტოვალუტით GeD-ით იყიდიან.

ჯაფარიძის თქმით, თითოეულ ხმაზე პარტია 50 დოლარის ეკვივალენტის 5 000 GeD-ს გასცემს, რაც მომავალში 5 000 დოლარის შეესაბამება. კრიპტოვალუტის მისაღებად კი ამომრჩეველმა უნდა წარადგინოს ბიულეტენის ფოტო, სადაც "35" იქნება შემოხაზული.

გარდა ამისა, გირჩი კრიპტოვალუტას გადაუხდის მათ, ვინც მათი მაჟორიტარი კანდიდატის, ჰერმან საბოს მხარდასაჭერად მთაწმინდაზე გადაეწერება ან არჩევნების დღეს მათ დამკვირვებლად იმუშავებს.

"ჩვენ ვაცხადებთ მზაობას, რომ 100 მილიონი GeD, ჩვენი ციფრული ვალუტა გავანაწილოთ იმ ადამიანებზე, რომლებიც ხმას მოგვცემენ ან აქტიურად ჩაერთვებიან საბოს მხარდაჭერის მობილიზებაში", — აღნიშნა ჯაფარიძემ.

რაც შეეხება დაგროვებულ ელექტრონულ ვალუტას, ჯაფარიძე ამბობს, რომ მოქალაქეები მას ორი დანიშნულებით გამოიყენებ:

"დაგროვილი GeD-ებით ნებისმიერი მოქალაქე ხდება გირჩის ორგანული ნაწილი და ეძლევა საშუალება მიიღოს მონაწილეობა გირჩში მნიშვნელოვანი პოლიტიკური გადაწყვეტილებების მიღებაში, მათ შორის 2020 წლის საპარლამენტო სიის ფორმირების პროცესში. მეორე დანიშნულებაა, მიიღოს მონაწილეობა გირჩის მიერ დაგეგმილი სახელმწიფო ქონების პრივატიზების პროცესში", — განაცხადა ჯაფარიძემ.